20 ሰኔ ግርጋ ኤልብ (ዝክር) ፍዳታታዅ

ቆል ፋርዕ እክባ ሙርቛ ብሊኑዅዱዅ

ፍዳታት ኤርትሪውድ ግርጋ ኤሪትሪውድሪ ኣኽረውድ ናውክ ኤሪትሪ ቑር ላገሽ ኮድጚነ ዪና ድግምሲ ጃበርድኽር ነበከድኽር ደንበርድኽር እንሸሸዋኽ ግርጋ ኣኽቶ እማ ናትክ ኮዶ ሕበርደሪዲ ኤልብድረሪዲ ኣኽቶና ዪና ምራዲ ፍዳታታ ምራዲ ሰጘኩ። ኮዶ መሪ ኤርትሪኹ ኒ ጨርስኽር ሕበረጚ ድባ ኤርትሪኹልኽር ገምዲጚ 20 ሰኔ ኤውጀሰና እን ጀረብዳኹ እልብ ጝን ዪኖ እናሓን 20 ሰኔ ዪና ፍዳታት ግርጋ እስነ 22 ኤመራ ጀበረት ደንቢ ኤልብ እስነኩን እንኩንኹን።

ኮዳ እን ዳሕኒስሮኽር ከውሲ ቀሰንድሮኽር ዩኑ እርግናኹ ሆደት ኒ ደርብልድ ፍድንነዲንላ ጂብናርሊ ፍዲተውድ ኤወይሲ ንኪ ና ሻን ናንድ ፊዲተውዲ ድደውዲ ክረውዲ ብጃኽንነዲን እና ብራ ኤርትሪሪ ናጝር ልሳዕ ብርዲ ፊኹዲ ንቑሩሲ ብትላ። ኒን እክነዲንኻ እና ኤልብ ኒን ደርብ ገፍል እስታኹ ግን። እማ እና ግርጋ ኒሂቲ ኤልብ ካያ ኣኽጚ ሆደት ፉሪስዅ፣ ለበካ ኮዳኹ፣ ድብለስ ሸጥ ስናኹ ግርጋ እስነ ቋልንንላ።

ኩሱሰን ብራ ብሊናኹል ሆደል ዳልየትል ግናቲት ሙኹሮ ሰጘው ካያ ኣኽጝኒ ኤርስዲ ዋሰረውዲ (ሸቓሎ) ምህሮ ቁርዲ ሸኻዲ ኣቕሽሽትዲ ጃምለትድር ላኹ ላኹ ድር ኒ ብሄርኻ ሓድራን ድጌታት ላ ቃስል ኡዋኹ እማ ኮዶ ናጝር ልሳዕ ብራ ኒኹ ብር ቓያኹ ኣኽነዲን ፍዳታሲ ኤልብድኑ ንደንቢ እምንድክ ሰላም ኣኽሮ ዪና ከው ና ላናርሲ ተብድኖ ና ብረስ ለውድኖ እና ግርገት ወሸቐዲ እሩጝዲስ ሓሸምድጝኒላ፣ ዕምጭሲ ዪና ኮሊትል ህንባኹ ኤሸሾ ቀንጠጥስሮ ናውክ ኒየት ሆደሩዅድ ማእኮት ቱነሪ ግርጛ እስኒንላ።

ክሰጋዅ እላ ክስሮ ጝን፣ ኒጝር ደኮ ደገምስሮ ጝን፣ የነኵ ዪነኮው ኒጝር ደኮ ደገምስሮ ጝን። ክዳ ድግም ኤርኖ ተሸንህንን።

ኮዶ ክስሮና ዪና ኳራ ፍቶ፣ ሙርቛ ብሊኑኹ ኤሪ ሙሩቑዲ ላሕመዲ ኣታቲንዲ እክብዲሲ ለመለም የን ካያ ክሰትና ፈሀም ዪናዅ ኒል ተብሮ ሻኹኹ። ፋርዕ እክባ ሙርቛ ብሊኑዅዱዅ ኒን ጝን ኒ ሕላን። ሳህሮዲ ጋብዲሲ ጎልየዲሲ ላዅ ነገሳዅ እላ። ዪና ከውር ና ዳንሲ ደኩስኖ ኡጝኒ፣ ቆልሲ ማእኮት እሲነ ፈረው ኣኽንነዲን ና ብሪል ለመለም የንቱታዲ እርጝኒነዲን፣ ንኪ ብሊን ግን ዩኖ ፋሽትነኩር ሓበንስነኩጝር። ዪጛ ዪና ቆልዕድ ውራ ለውድና ዪኖ ቋልንን።

ፍዳታት ላ ገና እዃርደሪር ሰነሎም ዪና መታን ላሕመዲ ክብርዲሲ ደኮው፣ ዪነልድ ጨበረናዅ ላሕማ ኮሊሩዅዲ ወረቢዅዲ ኣኸት ኤርእኖ ዪና ላሕመስ ተከውንን በጣ ባርነን ኤባይ ኒድ ግን ንቱዋኹና። ክድመዲ ምህሮዲ ደርፍፍ ሰርገሉሲ ተብድንን እክብስንን ኮድጝኒን። ላገሽ ኮድጝነ ኪድራ ዪናኹስኻ ዪና ክለለሰና ማእኮት ቱኖ፣ ሰበትንጝር ተብድጝር። ኤርትሪው ፍዳታት፣ ኮው ሰላምር ሕሳንኽር ናይር ኤርዶ ጝን ናው ክርስትጝነዅ እማ ዪ ጝር ና ፈለኸስ ሻኽኖ ና ፊነስ ተብድኖ ዪና በለዲ ዓንበብቶ ንርመስዋዲ ዳቶ ዪን ህንብናኹልክ ዪነድ ታሚታኹ ጉግድ ለመለምሲ ተብድንን። ፋዳታት ናክረድ ሑር እሲኒኹና፣ ኒስ ዪን ከልብርኖሉ ጓዋቑትነን፣ ሊጝር ክርድኖልና ጨበርና ግን ኒንኻ ዔብ ጝን እማ ነፈርሰናኽር ከውሰናኽር ሙሩቑሰናኽር ሑር ኣኽንን። ሑር ዪና ጅወድ ኣክነን ኤባይሲ ለብድኒል ሸክ እላ።

ፋዳታት ዲማ ኤልብስናው፣

ፋዳታታ ፊና ግብርድ ተከውስኒ፣

ክረም ፋሺስቲ ህግደፉ ትንኵሪርናው፣

ቆል ፋርዕ እክባ ሙርቛ ብሊኑዅዱዅ-ኤርትራ