blina.org. ብሊና

ብርህድና (መግለጺ) ኪዳ ሓዲስ 2014 አመሪዅ። ፈሪዕ እክባ ሙርቛ ብሊንኹ

እና ዓለምል ደውያኹ እላ። ኒውክ ንደርብድ ፍንሕንሕ የኩ። እዃርሶኵ፣ ገነኵ፣ ክረኵ። ግናደትር ኤሪውድ ሂወት ኣኮክክ። ናኹኻ ሂወት ጃቢተኵ። ውክትር ኒሰና ግን። ውክትሲ ሽብኒል ታሚናውክ ኤርእናኹ ጝን። ዪና ወክትል ውራ ድጝም ትክያዅ ዪና ኤሰልድ ባርንን ዪኖ ቋልኖ ህንባዅና ወክት ጝን።ትሮ ግርጋ፣ ኡናር፣ ኤርባ ኤመራ ደበን ዩኑ ሺብነኵን። እናሓን ሕዲስ ኤመሪል ቱንዅን እንዅንዅን እማ ኪዳ ኤመራ እሲሮልና ዪና ተምኔትሲ ጃቢስነኩንኩም። ኮዶ ተምነት ካይ ኣቕተገት

ደኩረሪ 2013 ኤመራ እን 2012 ኤመረት ትክስነ ከደምግነኽር ኣኸውድ ገሪ ጨገምዲ ኣኖካይድ ወሸቐዲ ኣኽቲ። ሆደ ፎርቶሩኹ ብኳኒሰና ደኵኹ፣ ላፓዱሳ ኻ ጅልልሲ ቋዅ ወሸቓ ኣኹዅ። ኮዶ ፈደናኽር ክርዶ ጝን ንሪ ዓንበብራኹ እማ ዪና ክሪል ሰገጥ የነሊ። ደኮው ክራ ምህሮ ኣኽሮና ህንበኵሉ። ኣዳሚንዱዅራ ወልወላዓሊ መንደርቱ ጠፍሓት ኤርዶ ኒውክ ሳንኪቶክ። ይጝር ሰንኪትነኵን እንኩንዅን። አከይ ደልም፣ ኮዶ በልጛ ህግደፍዲ ሃሳሰትድ ጣንጣወ በልጛ እና ኮሊ ፍትሕድር ናይድር ጠፍሕቶ ለመለምየንቱታት ኣኽኖ ህንብነኵን። ድርጝ ያኹድ ህግደፍዲ ኣኾ ጣንጠውሲ "ዮሴፍቲ (ኒት) ንክረስ ድወሉ" የነሰና፣ ክራ ነበክል ሳዕሳዓነት መኾኹኖሎም ደኵንን።

ንኪር ግርጋ ዪና ዕድሜትል ወንተርዶ እንተረላ። ናውክ ንኪት ንፍዕንስንላ። ብሊና ዓዋዲ፣ ጋብ፣ ብራ፣ ዋንትና (ሂወት)፣ ዪና ናይ (መሰል)፣ ዪና ድግም፣ ክድመት ልፍን (ማሕበርትነት) ከደምሳኹዲ ተከውሳኹዲ መንተልሳኹዲ ጝን። ላዅ ንቱ ለባኹስኽር ጉደላ አበድሳኹስኽር ብደላ። ንኪ ዪና ቀሺራ ዪና ሸኽ ዪና ዓለማ ላሕምደር ሕሽምድር ዪና ናይል ደው ዩኖ ህንበኩና። ንኪር ግብርኻ እመሪ ፈደን ትክየው ኣኾ ዓንበቦ ዪና ኮሊዲ ዪና ወረበዲ መቕርሕ ሻኑኹድ መቕርሕስሮ ጝን። ኒሰና ኤርትራ ልፍንድ፣ መንደርትነሪ ጝን። ሺርደሰናኽር ልፍንድ ናዕስነር ጝን። ልፍናርሲ እንጠርና ዕድር ጝን። ቅቤ ጝን ቅበኻ እና ናን ህባኹሲ እዃሮ ህንበኩ። ኮል ኣኽን ከደን ህንብናኽር እቅትራ ዪንን። ንኪ ልፍናርሲ (ማሕበርትነስ) ረአድድር ላሕመድር ፍትሕድር ከደምነን፣ ሻምት (ፍቅሪ) ፈድነኵን እንኵንዅን። እመሪትሪ ብርክስጛኻ ፈርሓትርኽር ዓፍየትርኽር ኣኽቶና ሸክ ሻኽላ።

ፈሪዕ እክባ ሙርቛ ብሊንኹ፣ ብሊናር ሙኹር ብሊናኹ ኣኸት እምነኵ። ናውክ ላገሽ ኣኽኖ እና እክበስ ሳዅስነዲ ነድቕነዲ ዪና መድ ጝን። ዪና ወረባ በለልስጝን ማለት አሪ ከውዲ አሪ ዓዋዲዲ ሲ ወረስትጝን ፍንሕንሕን ዪንን። ኣዳም ኣዳሚንዱኹራ ባራ ዲርዋኽር ክርጝን ለመለም የኵ። እና ላሕመዲ ኬርዲ ናይዲ ብሊናኹሲ ኒሰና ኮሊሩኽሲ ሰርገልድሮ ለመለም የንቱሩ እክባስ ዪን ህንብናኹልክ ተከልኖሉኽር ተከውኖሉኽር ዪና ውጅብ ጝን። ዪን ንኪር ቅር ፍርኑ ዲነኹ እስታት ዪና ኣፋይቱኹ ጝን። ኣቕትራ ዪንን። ፈሪዕ እክባ ሙርቛ ብሊንኹ፣ ብሊና ኒ ናይ አሮ ኒ ብሪል ፍትሕድ መደርትሮ ኒ ኣባይሲ ፈጠኖ ለመለም የኵ እንኵኹ። አባይሲ ሓበርበርና ዓውቲሰለና። ፈሪዕ እክባ ሙርቛ ብሊንኹ፣ ኒስ በርህዶ እና ደኳኹ ኤመሪል ዲባ እክቢዅ እሰ ኒ ማርሔን ፍሪሮ ክድመትል ህንበኵ። ፈሪዕ እክባ ሙርቛ ብሊንኹ፣ ኩቱብት ኣኽን ኣኼባታትድ ኒሰና ፓል ቶካትል ዪና በላይሲ ካያ ኣኽጚ ናትክ በላይን ኤሪትሪውሲ ኒ ወቄይሲ (ቁዋም ሲ) በርህዶ ድዊኹ። ኮድ ህግደፍ ኒን ኒ ስርልድ ሙኵዳዅሉ ጉግ ኣኽነዲን ገንጆ እላ።

ሕርየት ከሸሪሰና እውሰላ። ዪና ወረባ ግሲትር ምልጋስኽር ኣኽቶ ንርቁር ለመለም ዪድኖላ ጨበረቲና እንኩቲ። ኒንኻ ኮል ህንብናኽር ኣኽን ጋይትኖ መንደርትናኽር ብሊና ሙኹር ኣኸት ኣስተውዓልድንን። ንበሀርዲክ ህግደፍቲ ሙኩድኖሉ ዪና ናይሲ ሰርገልድኖ ኮውታት ኤሪትሪውዲ ልፍናርሲ ተብድኖ ለመለም ዪኖ 2014 መእኮት ሲ ሓደስናዅ ወክት ጝን። ናን ሕበርገውስኻ ሕበሪትኖ ሽጝነኩንኹም።

ፈሪዕ እክባ ሙርቛ ብሊንኹ ኮልኽር ከደንኽር መደርተውሲ ኪዳ አመረ እኽሮና ኒ ደባንዲ ኒ ሳደዲት በርህደቲ።

ማርሔን ክረም ህግደፍ ጨደፍናው!!!

ላሕመዲ ለመለምዲ ሆደሲ!!!

ፈሪዕ እክባ ሙርቛ ብሊንኹ 12/31/2013