www.blina.org

You are here:   Home Blog Blin/ብሊን ኣዋጅዲ ፊነዲ ሙርቋ ብሊናዅ፣
ኣዋጅዲ ፊነዲ ሙርቋ ብሊናዅ፣
Monday, 27 October 2008 16:10

ኣዋጅዲ ፊነዲ ሙርቋ ብሊናዅ፣
ይና ሻን ሓይሳንዲ እቴታዲ፣

ይን ብሊን ነበክ ኤርትሪኹል መንደርትናኽር፣ ይና ዓዋዲዲ፣ ይና ክኒዲ፣ ይናጋብዲ፣ ሻኽናኽር፣ ለጛ ሃይማኖታተል እስላምዲ ክስታንዲትል፣ እምናኽር፣ ጎደነዲ፣ ምቓቕናርዲሲ፣ መንደርትናኽር፣ ግን።

 


ይና መንብሮ፣ እኺርኺር ዳግ ይና መቕጠንሊ፣ ገማዅ ጅብናር (colonization) መራ ጎቶና፣ መለክነዲ ሃሰስነዲ፣ በጀኸሰነና፣ ዪና ሻን ኤርትራ ቁርዲ ኣኽኖ፣ ይና በለዲት ለውድኖላ፣ (to liberate) ሰኾረጝን ኤመራ ለመለም ይንኹን። ሑርየት ዳልየትል፣ ይን አውኒ? ይና ወረቢልኻ ውራ ጀረብዳኹንና? ይግኒ፣ ውድባተል ኤሪ መርቑዲ ሕበርሰነ፣ ና ጋብስኽር ጋብኑ፣ ናዓዋዲትር ፈርኑ፣ ሰኾረጝን ኤመሪ ደንቢ ኣቶብየዲ ንርማስዲድ ቂልሲስኖ ኤመራ 1991 ኤርትረየት ለውድንኹንላ ።


ህግደፍ፣ ስልጣንሲ ወነኖ፣ ሜሪ፣ ፍትሕዲ ምእክርዲ እንግጋኽኽ። ተከሎ። በልድስክ ኩሕኖ እሰክ እንኩኽ። ኒትክልድ ኻ፣ ይነት ንጃብ ቋልግናዅ ጅብናርድ፣ ይና መንብሮት መስከንዶ (useless)፣ ይና ብራስ መልበዶ (deforestation)፣ ንፍሖሪሰና፣ ትግርዲ ድደዲ ይና ኣኾርሊ ሸይሸይደኩሎም እንኩኽ። ይና ወረባ ባትክ ኣኽላ። ይና ወረና ኒከውድ ኣኾ ኤሪውል ካሩ እርጋዅ ንኪ በተክዱኹሉ። ኒ ምርወት ብረስ ጠዓንቦ። ደሽክልያ ቁርድ። ወረስቶ፣ ና ቅበሲ ክርመስ ሉምስነ፣ እወነንንኻ ድራትናኽር። ገበነምናኻ ኤብድ ክነኽር። እንሸወነንኻ ድቛል ኣክናኽር። ፍትሕ ሓስእኖ ህንብነኩን። ይና ዓዋዲት ዲሂስኖልና፣ እንከሊዲ፣ ኤማንዲ፣ ጂጛዲ፣ ወዓብዲ፣ ቂራ ነበኺ ኣኾ ዋልዴን’ኻ ናቑርዲ። ጎር ኻ ኒጎርዲ። እጀክድኑኽማ። ይስትነግናኽር ኣኽኖ ይና ርሕሲ እንጠርኑኹን። ሃይማኖትዲ፣ በህሊንዲ’ኻ ደርቆስትኖ ዋሳው ቡኑዅ። እና ሓለት ንድ’ኻ፣ ይና ወረባ፣ ሑርየት ደምቢ ዓቝሲ ሸኾ ደንቢራ ከ ህንበክ።


ወጥን ህግደፍርኹ፣ ጃር ካበለሉ ግራ ደሽክሊ ኣኽገው ሙሩቑሲ (ብሄራትሲ)፣ ደሽኪሊ ጋበንቲ እሲሮ። ዓዋዲ ናውስ’ኻ፣ ዓዋዲ ህግደፍሩው በልዶ። ብራ ናዅስ’ኻ እን ኒድ ከደመውድ መጠይሮ። ኤርትረት’ኻ ፍትሕዲ ማእኮዲ እንግግረሪ እሰ ኒ ጀረበስና ክስሮ። ውጥን ሻኵ። ሽቓ ክድመት የክ ይና ኣጀትኒሲ ጠረስዳዅ። ሽከር ክፍሊትልድ ሳወዲ። ኤሪ ገዳማተል’ኽር (collages) ክሳኹሎም። ዋልደና እንከሊ ላሓምጊንሎም። በክስታኑ ኣኽን ምስግዱ መሀርስግኒን። ናጋብሲ ተብድግኒን ግን። ሕጊ ኣኽኒ ኣገባብ እንግገድ፣ ውጥን በልዱኽድ ምስምሶ ሻሎትሲ ሒልድ ኣዳኽር፣ ኮሙኒዝም ስታት (ዕላማ) መሄርድሮሎም ዮ ግን። ጃርኽር እንገው፣ እንከልኽር ና ለበኪሊድ ሓረጥሰው ኣኽኖ’ኻ፣ ኒ ጀረባዅልክ ቱስሮሎም ጥብሕ ፋሺሽቲሩኽ ግን። ይና ወረቢል ንኪ ዔብር ድዶ፣ እንከሊ’ኻ ሺሮ ህንባዅ ንድ ሰርጥ ግን።


ደሽክሊዲ ዓረብዲ ነበክ ጋብ በለዱ ኣኸት እምነኩን። ሰ’ጀር ምእብ ደንቢ፣ ደሽክልማ ወሪ ዓረብ እን ሙርቋ (ብሄር) ፍሪራዅድ፣ በትሰና (subject) መሃርዲስኖልም ኣስታሃላዅ ግን። ይን’ኽግር ጅና ኒ ገነር ጋብድ መሀርስሮ ይና ማእኮት ግን። ደኣም ኒ ደርብ ሻዅኽ። ፍትሕዲ፣ ፍሪርዲሲ ኣኽሮ ህንበኩሉ። ገባይል ሰንሒቱ ይና ቁር፣ ዓረብ’ማ ወላ ደሽኪሊ መሄርሲኒን ናው ፍሪርናዅድ ኣኽሮ ህንበኩሉ። ጅና ኒ ገነር ጋብሲ መሀርድና ካያ ኮዶ ኣቕተላ። ኒ ደንቢ እንተረው ንናይ ህንበኵ። ጅና ምህሮት ድጞሰና ክድመትር ኣርዶ። ኒኮል’ኽር መንደርትሮ። ኒወረበስር መርሒሮ። ዳበርድሮ። ኣከን፣ ኒ ወረባ፣ ኒ ዓዋዲትድ ፈርዶ። እን ሜሪ ኒ ኮኻ (local government) ኒጋብድ ጋቢሮ። ጀረብደኵ። ይና ወረቢል ኣኽኒ ኤሪው ሙርቕ ወረቢል፣ ጅነስ ኒ ገነር ጋብሲ መሃርድኖ። ሜርር ክድመት’ኻ ደሽክlልያ ጋብድ (working language) ፈራዅ ሃቢነሉ ህንበነኵ። ኒንኻ ጉርበትል ምስጢር ሻዅ ግን። ይና ቑርሲ፣ ዳገንድኖ። ወረበስ ባሓድኖ። እሲነዅ ክድመት ጅብናርዲ ቅበዲ ግን። “ኩ ገነር ጋብሲ መሀርድንኹንካ፣ ናትኻ ፈርዶ ኩ ወስዲ ኩ ፍንጢርዲ ጋቢ“ ይና ዕምጭ ኣኸውድ፣ ይነሰናክ ዓመጭሰውዲ ኣኽኖ ለመለም ይኖልም ግን።


ይና በለድ ህግደፍ እንትረትልድ ቅሳነት ኤርላ። ላውዲ ሸንገብዲሲ ኤርትራ ወረርስቲ። የክ ላዶንኻ ሱዳንዲ። ላዶንኻ የመንዲ። ላዶንኻ እቶበየዲ። ላዶንኻ ጁቡቲዲ። ናን’ኻ፣ ኣሜሪከዲ። ሰላም ደርብድ። እንክስትሮ ሻኽው ኣጭጉምሲ። እንሽኽዲ፣ ዋኸዲ፣ ሾከት’ዲሲ፣ እንክሮሎም ጀረብነዲን። ኤርትራ ንኪ ማዳኽር ሸኽላ ሻሙኹር። ነን’ኻ ቂጦሪል ሰየምሶ ከፍ ይሮር ስርጥ እሰው ኣኸት ከቲኒሎም። ምስምስድ ድገ ሰላም እልላ፣ የክ፣ ማእትኮ’ዲ። ፍትሕዲ። በለድል ሰርገልጊን ደርብሲ እክክምድ ካለቦሉ ህንበክ። በለድ ርድቕሲ ኒ ቑርድ ኣኽሮሉ ኣብሑርሊ ገምደኵ። ይና ቑርሲኻ ገንጂን እሰ፣ ጎደነዲ፣ ክድመትዲት፣ ሓረሞሎም። እን ረድኤት ባሓር ቁር ኡዉኑዅሲና ኣበዶ ንኪ ክሪ ኤርግል ህንብነኩን።


እና ዕምጭ ኒንን ናትክ ቛላዅ ግን፣ ይስቶ ደኩስታዅ ኣኽላ፣ ውሪዅ? ይደነን፣ ኒትክልድኻ ይና ወረባ ጨረርሶ ህንባዅ ኣኽነዲን፣ ኣመታት ፈረው እንሽኻት ኒ መቕጠንሊ እርግነዲን፣ ትግርድ ድቶ ላሪ ከብተላ እላ። ንድ ዳግል’ኻ ይና ወረቢል ክሰውር።(governors) ዳነየውር። ተከወውር። መሀርሰውር። ደሽክልያ ቑር ኣኸውድ። ቛው’ሲ ቛልኖ በየንስኖ ህንብነኩን። ላዅ ሌጛ ይነሻን፣ ይና ወረቢል ፈሰነውር። ና ጂጊዊው ግን። ናው ይነውስክ እሰው ግን። ይን ረደይነውር ፍሪርነውር ኣኽኒ። እና ኣከውስክ ቋልኖ። ዳይረክተራት ከረንሊ ህንበውሲ ሺባ፣ ብርቲ መጋሪሑሲ ቛላ፣ ይና ቆልዕ ጋይተውሲ ወንቐራ፣ ምስጢር ኣኽጊ ኣድሓ ብርሃንሊ ኣስተው ዕምጭ ግን። ይናቁር ዓረብድ መሀርሰው፣ ሑርየት ደንቢ ኮል ኣተየው፣ ከበር እወውዲ። ትርጅማንዲ ኣኽኖ። ከብቲነሰና። ናድ ኣወይስኻ ናልድ ሓየመው። ደሽክልያ ቁር ከፍ ይኖ መለይነሰነሎም። ና በልድሲ ባርኖ ጋይትነት ዋሩቕ ሕኩሙ መስከረው ግን። እና ድዳ ኒስ ዕልልሲ ሹጙስኖ ቋልኖ ዋጅብ ኣኽላ። ደሽኪሊ ይኑ። ዳኣም ናውክ ሙቑል ግን ዋሲስሮ ሸኽላ። ይነት ካበውር። ይነዲ ስረውር ህንበነክ። ይና ናይዲ ኤውርናዲ እምነውር ህንበንክ። በልንኻ ኣርእብነድ። ትክ ይኖ ህንብናኽር ተከውሎም ህንበንክ። እማ ኔስ ድዊኖሎምርኽር መሀርድኖሎምኽር ሆደ ንር ሙኹር ግን።


ሕኩመት ህግደፍሩኽ፣ ይና እንከሉራ ኣኽገት። እኒት ካበውር፣ ኒሰና፣ ኣፋይቲ ኣኽነት። ከደን ፍኖ ይና ሶትሲ ክብስነ ገባይል ኤርትሪውድ ድዊኖ። ቅሽንሲ (world) ሓበርኖ። ለመለም ጀረብደኩና። እና ሕኩመት ኒስ ካባዅ። ሪሕ ይነኮኽ’ሲ ደኩሳኹ ኣኸውድ። ብራ ክሰን እመሪ ፍትሕ ደርብድ ወንቐርኖሎም ኣኸነት ስምዕ ባርነኩን። ብራ ሓግላን ኣረሱ’ሲ። ሒልድ ኣዶ። ዶላር ሸኸውድ። ክደትሎም ናውክ ኣርእንዅን። ኒን’ኻ ዕምጭ ኣኸውድ ኣመሪ ና አርደትል። ወንተስኖልም ኣኸት ንኪትልድ ኣሰሚዕድነኩን። እና ዕምጭ ኒስ ሰርገልኖ። ደኣም መቕርሕስኖ፣ ናውክ ላት ለሓምኖ፣ ሰልፍ ጀረብዳዅ ግን። ለመለም ደርብድ ወረቢል ጀረዮ ህንበውዅሲ፣ ረሃይድኖ። ኣመሪ’ኽር ኒት ተከው እንትግኒን ተከውኖ። መቕርሕስኖ ((organized) ህንበኩና። እና ሕኩመት ኒን ሰላምድ ወንቐርሱዅ። ደኣም ዋስላ። እማ ሻን መቕርሕድ ክረሪ ኤርትራ ጠፍሕድኖ፣ ለመለም ንኻ ኣሪዅ ላሪ ፍሪር ቋልነሊ። ይና ወረቢል፣ ገንጂን ኣኽኖ መንደርትኖ። ጀረብነሊ። ውድባተል ሰጝናኽርዲ። ህንብናኽርዲ። ግን። ደኣም እና ውድባት “ፍትሕ ሙሩቑሲ ኣመሪ ቋልነሉ ናን ካያ እና ግርወስ ለብድን” ዮው ኣኸውድ፣ ኣመሪት ንኪ ቛልኖላ ውድባተልድ ድሕር ይኖ ሆደ ብሊናኽ ኣወጅነኩን።
ሜሪ ኤርትሪሪ፣ “ብሊ’ሲ ጃብረድ ኣኽኒ ጉርበትድ በራኽኑሎም። ላሪ የገው። ሕያይት እስኒኹንሎም። ንደንቢ ናት ቛላኽድ ገንጅንን።” ይኖ ህንበውሲ፣ ንደንቢ ገንጅትኖ ኣኽድኒ ይነኵን’ሎም። ንሰበትድ’ኻ ሆደ ብሊናኹ’ሲ ዲሂስድኖ’ኽር። ኒ ከወልድ ሲዲድኖና’ርኽ። ብረዲ ሰመዲት ጠዓምድኖ። ኣኽነት ኤርእንኹሎም። ኔድ ቡንጛ ኣኾ ይና ደርብል ደውያ’ኻ። ወረቢልድ ሰቐቕኖሎም ግን። ህግደፍ ለመለም ያዅ ብነዲንግን ኒ ዓጀው ጀው ያኽ። ኣመሪ እምን ሸኻዅ ግን ሰርገላዅ። እምንኻ ዓመጭስና’ኽርዲ ዳድስና’ኽርዲ ህንበቲ። እማ ሆደ እንተወረቢዅሲ ደኵስድኖ ኡጋ። ሆደ ፍትሕ’ዲ ኣረክ’ዲ ይናኮል እንትራስኪ፣ ለመለም ይኖ ግን። ፍትሕ ከረርስሮ ግራ ተኸትል ህንበቲ። ኮል ኣተይቶ መቕርሓ። ላሓማ። ከለብረለ። የቲና እንኩቲ።


ሆደ ሙርቛ ብሊናኽ፣ ዕምጭ ከድንድ እንትኒ ጂዊልድ፣ ሰረንታ ሻኽላ ዮ እምነኣዅ ኣኽነዲን ንትክ ዕምጭሲ ለመለም ዪሮ ግን። ስታት’ሲ ቋልግኒ ንኪር ይና ሺብሲ ቛልኖ ቓበበውና ቢሰኒ። ደኣም ስታት ግን ለተቓዅ። ፋርስ እድሪስ ሓምድ ዓውተ’ኽር ለጛታ ኣዳምዲ ብርፍ ዮ ግን ኒ ለጘትረን ሚልዮንሲ ዳግ (70ሚልዮን) ንዓውቲታኽ። ቒልሲስኖሎም ግን።
ብርፍሊ ህንብናኽር ኣኽንነዲን ላዅ ሌጛ ደርብል ዓንቕፍግኒና መኾኽነውኩም ቢስተለና።
ይና ሻን ሓይሳንዲ እቴታዲ፣


1. “ኣውኒ ደኩሶኩም ብሊን ወረበድ ጋብደናኽር” የው ቢሰተኒ?


ኣውንኻ ህንባኹን ይና ወረበድ ጋበግኒን ድንክል እሰኹና። እንተትኻ አውኒ ደኩሶኩም ይነት ወንቐርደናኽር? እና ውዳብት ናውክ ሸዓብ ደኩሶሎም ማ ናው ለመለም የናዅ? ይኖ ወንቐርነንሎም ወንተሰገውሲ ህንባ እንተወረበድ ወዓበጋ ይነኩንሎም። እን ደርፍፍ ተሩ። ኣውያኽ እርጉኽን ኣኽጊ። እን እስታሲ (aim) ሰርገልዶ ከደምናግን ሓቕ። ይን ግር ሲመርዲ። ሓሽመዲት። እርጊኒ። ክድመትዲ። ተዓብዲ። ማል ይና ጪዊውሲ ሓረጥነዲ። ቂራ ገንጃ ብነዲት። ህንብነኩን። ኣመር’ኻ ኣባይልድ። ጀኸንዲ። ጃር ተከውኒ ክረዲ ጨበረኩና እንኩዅ። ህግደፍ ካያ ሕውን ወረቢዅድ ልኽስተላ። ይን’ኽር ይና ወረበድ ተርሃግናኽር ኣክነን ጨሪትነኩንሉ። ንትክልድኻ እና ጃቢትኖ ኮልድ ጋይትና’ኽር፣ ይና ወረባ እንእማኒሰና ህንባዅ፣ ተከውሎም ቢሰኒና። ዳኣም ይና ዕምርስ’ኽር ቛልንን፣ ይነቁርስ’ኽር መኸልትንን፣ ድድነኩን እንኩንኹን። ሙራዊ ቁርሰና ላውዲ ሸንገብዲሲ ድድግኒን ይና ሻንሲ ብግኒን፣ ሓወን ግኒን።
2. “ዋስኒ፣ ሽጝስትኒ ፣ ክስታን ወሪ እስላም ካያ ብርፍ ሲኒኹሉ፣” የውር ቢሰተኒ።


ናንኽግር። ድምኖልኩም። ተርሊ ናትክ እክብኖ። ጀረብነን ከድመት ከደምሲጊኒ፣ እና ወረባ ጨለሞ መንድርትኒ ግን ንዋሲሳዅ። ጃር ካያ ግን ናትክ ላኳሪል እክብሮና ቐደራዅ። ይንኻ ከው ግን። ወረቢ ቁርሲ ይና ቕድረ’ዲክ እክብኖሎም ለመለም ይንኹን። ደኣም ምኺርደነው ህንበኩኩም እማ ኣልብዲስኖኩም። በላይን ሆደ ብሊናዅዲ መቕርሕሮ ጀረበገው። ህግድፍ ህንበንክ። በላይን ውድባታ ኤርደት ህንበነክ። በልጛ ኮል ወንተተርዶ። ጀረበውር ህንበነኩና። ኔን ና ከብቲነድ ሆደ ሙኹርድ ወንቐርሳዅሉ ኣኽላ። ዲባኻ ተሩዅሊ፣ እኽርድ ኣኽኒ። ሃይማኖትድ ኣኽኒ። ስያሳድ ኣኽኒ። ወረቢልድ ኣኽኒ። ታምም እርጉኽ። ኒስ ሽጉድናኻ ኩሹቲ ሹግድነግን። ናውክ ይና ለበከድ ጂጚስትነ ላ ፈሃምድ’ኻ ፍንኹን። ውራ እስንን? ይነሰሰና’ኻ፣ ሆደ ሙርቛ ብሊናዅ ብርፍ ሲኖ። ናውክ ላሕመድ ምእክር ቱኑኽን። ናን’ኽር እና ክደምት ኒ ተርሊ ግን ኒ ህንበክ። ላሕማ ወረቢዅሲ ኣበሪስኖ፣ ናትክ ጂዋ ኣኽኒ ኣንኳ ቅሽንሊ። ህንበውሲ። ልሄክኖ፣ እማ እክብኖ። ኒስ ጠፍሕድረሪ ወክትሪ ሽማግለ ደው ስኒኹን። ጃር ሕበርሲኒ ይናኽር ካበና’ግን። “ኢ ዓልኮ” እናስ ወደ። መሰልሰና ሃበጋ። ክድመት ይና ጃብል ህንበኵ ግራ ይና ጉርበትል ኢላ። ክድመትልድ እግርጋ። ኒ ወረባ ከበርጋዅ ኒቱ ከበረላ። ኒወረባ ቀሰንጋዅ ኒቱ ቀሰንዶ ኣኽላ። ይድ ካያ ታሚትንለ ይና ከብቲኒ። ይና ቁርድ’ኽር ወረብድ’ኽር ከደምኖ ከርተተፍ ይንን።


3. “ብሊና ኒ ለበካ ነገይላ፣ ኒ ለብካ ነገይጋኽዲ’ኻ ከደምሰላ” የውር ህንበንክ።


ሆደይ ብሊናኽ ሰላምዲ ጠፍሓዲ ላሕመዲ ወረቢኹል ለመለም ያዅ ግን። ናውክ እኽርስከው’ኽር ሃይማኖት’ኽር፣ ሸኽንኹን። ደኣም ኒን ላኹናርድ (individual) ቛላዅ ግን። ናዋ ና ኣክ ኣካንክ ህንበኩሎም። ብሊና ሆደ ዓንቐፈው ኣኽላ። ሆደ ብሊናዃ ናትካዅ ግን። ኣዳምር ነጎት’ኻ ሻኻ’ሰና ግን። ከደመን ግን ኒ ለጭሓዅ። ኮፍ ያዅ ሻኻ ዓለለክ። ኣዳም’ርኽ ኒሰና ክድመት ብነድ ጀረብደገውሲ ጫበጡ እርገኵ። ይና ወረባ ክድመትር ትምህርት’ኽር ሻኽላ። ኒ ቑርድ መርሕሰተ ኣርላ። ጅብናርድ ኒ መሄነን ፌዅ ግን። ከድንድ እንተውኻ። ዓዱር ፈዲኒኹሉ። ኒ ኣኽነዲኻ ለምለም ሽጝነኩን። ሆደ ኔስ ስርልድ ሙኩቶ ግን ንሪ ጉሮ ህንብራዅ። ኩሹቲ ጫድቕ ኣኽሮ ኤሪውሲ ልኽና ኒ ወክት ደኩዅ። ጋብድር ካያ ሰደርሳዅ እላ። ላሕማ ብሊናኹሲ ይና ለጛ ዕልልሰና ቛልኖ። መሓልናኽር ግን። ናትከልድ እዃርስናኽርዲ፣ ሌጛ ሃይማኖታተልድ እንትናኽርዲ እኽነውድ። ሙቑልሲ ቂረድ ፈረግኖሎም ኣኽነት፣ ኣሰሚዕድነኩን።
4. “እና ለመለም ኒን ተረገስተጋዅ ድንጋ፣ ካርሰጋዅ ወረባ ኣኸት ኣርእዱኑኽ’ማ?” የውር ዋስነኩን። ተር ሰግኒ ይና ድንክክሲ ከተብድኖ ጋበነውሲ ዋስገሎም፣ ዳዊትር ጊሪ ኮት ጎልያቲል ዓውቲቱዅ። ምርወዲ። እምዲ። እርግነዲሉ። ጃር ካቢኹሉ። ይን’ኽር ይና ከውሲ ሻኽኖ። እምንሲ መርሕድነ። ጃርሲ ኮድኖ። ደንገስ’ኻ ፍኖ። ወረበስ’ኻ ካርኖ። ግን። ይና ጃብል ህንባዅ ሒል ቡኽቡኻ ግን። እንደርያ ጅብናርሲ ተምነትጋ፣ ለመለም ይሩ ክራ ሕሽመት ግን። ይነ ክል ሱቛኹት ኣኽኒ ኣዋኹድ እንተውሲ ለመለም ይኑ፣ ወርበስ ለውድኑኽና። ጭንድቕሊ ፍዲተው፣ ፋርስዲ ሓይስዲ ከነቲባ ሃኪንዲ ኒ ጨርዲ፣ ሓልሓሊ ፍዲተው፣ ፋርስዲ ሓይስዲ ዕመር እዳዲ ኒ ጨርዲት፣ ና ፈለኻስ ዳድኖ ና ምእክርሲ ተከውኖ፣ ክርነን’ግር ክራ ሻተት’ና ግን። ፋርሳን ይና ወረቢው ኣኽናው ይና በለዱ ደፈንስኖ ክብቲድኖ ኣኽኒ፣ ዲመክ ኣልብስድኖ ግን።


5. “እና ብሊና ሆደ ይና ኣግዋርዲ ኒትክልድኻ ከረንሊ መንደርተው ብሊንሲ ናሻንሰና ቛለው ደሽክሊዲ ሽሊዲዲ ዋኺስትኖና ሄብደነ ግን የውር ህንበነክ።

 


ናዲ እዃርስንኹ’ኽር፣ እዃርኑኹን’ኽር። ይን ሻን ግን። እን ኔስ የው ስርጥሲ ግን ጀረበው። ሆደ ብሊናዅ ዋኸዲ። ዕላቕዲ። ስታት ሻኽላ። ይን ዓመጨውሲና ለመለም ይኖ ግን ይን ጉናኽ። ብሊናርሲ ኤሪውድ ዳግ ገምድኖ ሕላን ሻኺኒ። ደርብድ ደኳስክ ሽልያ ኣኽኒ። ደሽክልያ ክርጝ ማልኖ ግን ይኒ። ኒሰና ዓዋድ’ኽር ሻኽኒ። ይና ወረባ ጋሻይ ከልብራዅ። ጂጛ እንከላዅ። ዕምጭ እንጠራዅ። ኣኸት ሓይሳንክ ኤርእኑዅ። ለመለም ይኖ ግን። ጋብ ይነው ድደኵ። ይና ቖልዕ ድራር ብኑዅ። ብራ ይናዅ ህግደፍድ ወረቱዅ፣ ይኑንጉሲክ። ኔስ መሰከረው ይና ሻን ጊንዲቶና ህንበው ኤርእኑዅ። ሰንሒትል እኽርኽርሲ ሓሸምድኑ’ኽር። ከበርድኑ’ኽር እርግነት። ከረንድ ደኳዅክ ረቐቡ እርጉዅ። ናን’ኽር ሆደ ብሊናዅ፣ ማንሸው፣ ማርየዲ፣ ሽልየዲ። ዓንሰበዲ። ጀብር ቁር። ተዃርርዲ። ጅዋ ከርን ቑርዲ። ይና ኣግዋር ኣውራጃታትዲ። እን ሰጛዅ ተክሊብዲ። ሰላምዲ። ፍትሕዲት ወንተስሮ ለመለም ያዅ ግራ አሪ መንጎራ ክሚገት ይና ቖል’ሲ ኡነኩን። ናውር ና ገፍድ ካቢድኖና’ኽር። ሞራል ኡድኖና’ኽር ጨበርነኩንሎም። ከረንድ ቛላኹድዅ፣ ብሊንሲ ናቱ ቋላዅ ኣኽላ። ናትክ ስንሕትሕትል መንደርሰው’ሲ ቋላዅ ግን። እና መዲነቲ ኒኒ ምኺርስሮኽሮ፣ ዓመጭስሮ። ዋንትረት ናውክ እርእንኹን። ይና ቑርድ ክብያዅ ትምህርቲ፣ (ኮለጅ። ዩንቨርሲቲ።) ንርትል መንደርተውድ ኣኽኒ ሸላይልድ፣። ሕክምነዲ። ቲዃዲ። ዓቑዲ። ኣሪው መዲነት ጀረብደው ብሮ በረውረው ዪርት ቋልነኩን እንኩንኹን። ኒጛ ናትክ መንጎሪሳዅ ግን። ወክትሪ መዲነት (modrn city) ኣኽቶ፣ ናውክ ለመለም ይንንላ።


6. “እና ጨገም ምርቑዅሲ (ብሄራቱኽሲ)፣ ይግ’ርኽ ኣርእንኹሉ፣ ናልድ እዃርስና’ኽር ህንብነኩን። ደኣም ናን፣ እና ኣስመሪል ከፍ ዮ ህንባዅ ናትካ ኣብያሲ ለብድንን፣ ኣመርኻ፣ ማእኮትት ወንቐርዱኑ እንታ ጃብል ኣካዅ እላ” የው ላውዲ ውድባዲ ህንበነኩ።
እንደንበረሲ ተርሲኖ፣ ሆደ ብሊናዅ ኒ እንከሉረዲ ኒ ኣባይዲት ፈረጎ ፈራዅ ግን። ይነት እንከለውዲ ዓቑዲ ሸብዲ ኣኽኖ ከደምኖ ጉኖ ህንብናኽር ኣኽነት ኤርእድኖ ተዓየብነኩንሎም። ይን እን እምንድ ከደመውሲ ዓንቐፍግነት ቆል ቱነኩን። እን ሊገር’ኻ፣ ኤርትራ ሕርየት ተማሚ ኣርቲ፣። ህግሓኤ፣ መሓልዱ’ኽር፣ ጠሓልዱ’ኽር፣ እርግረሪ፣ ደኣም ኣስመራ ኤተይረሰና፣ ጠለምሮና እናሓን ለጘረጝን ኣመራ ሱክረዅ። ይና ወረበስኻ ከረብድቲሉ። ኣመሪ፣ ንኪ ይነድ ዓለተስ ገንጂስቶ ምልደው ኣኸት ትክስነ ኣርእኖ ህንብነኩን። ውሪኽ ኣመሪት ጅባኹላ፣ ሒልዲ ከውዲ ሻኽዲ ግን። ይን ይነሹቲ ውራ እስኒኹን። ይና ውረባ ጨነተክ እንኩዅ ግራ ዳበረክ እንኩላ። ይና ቆልዕ ጋይተነኩ እንክኑኽ። ኔስ አውኒ ና ኣላ። ኣመሪ ናኮል ወንተርድኖ ኣከነን አውኒ ናት ምርሓዅ። ንኪትልድ ናጉርጉርበት’ሲ ፈርኖ ና ዓዋዲዲ ና ጋብዲ ዲሂስግኒን፣ ለመለም ይኖ ግን ይና ውሪኽ ፋሕስና ዋሲሳዅን? ኮል ህንበው’ኻ ከልብርድኖሎም፣ ከደን ፌው’ኻ ወንተርድኖ መቕርሕና ለመለም፣ ጎትሮ ግን የውና ምለና ኣኽወድ ናትር ለመለም ይኖሎም ግን። ብሊን ሱዳን ጋይቶ ሰጝው ና ኮል ወንተሩኑግሲክ ቛላኽ ህንባኹማ፣ ታዕሪፈራ ሻኽጋዅ፣ መቕርሒ እሲጋዃ? ኒኮል ወንተርዶ ቐደራኹማ። ሆደ ንር ስታት፣ ብሊና ዳበርዶ’ኽር ላውሮ’ኽር ለመለም የቲ እንኩቲ። ቐደርደነን ካበላ እኽገት ምለገላ። ከደንሊ እኳርነው ና ወረቢል ወንተርኖ ዓቝ ጂእሰው ብሊን ጋበግነት ይና ዕሊድ ቛልነው ይና ኣጭጉምሲ ውሪኽ ሰተርናኹን። ሙራው ቁርሰና ኒድ ይኖ ድድኖ ውሪዅ ተምነትናዅንሎም?


7. ኣድኹር ጋብዲ፣ ቅበዲሲ፣ ጋበው፣ “ብሄር ኣኽዲኒ፣ ብሄር ዓቅም ሻኽዲኒ፣ የውር ቢስተኒ።


እና ሙርቛ (ብሄር) ኣኽዲኒ ህግደፍ ብረስ ወነንደሰና ይረው ጋብ ግን። ሙርቛ ኣክና ሲመር ተከሎም፣ ኣኽድኒ የነኩና ኒን’ኻ ቅበ ግን። ጥምሕ ናዃ ኔስ እንደዋ ይነንሎም፣ ይና ጋብዲ ይና ዓዋድዲ ድዱኽ ይግኒሎም፣ ይነቑርሲ መሀርደነው እከይ ግን። ውሪዅ ኒስ እንጀጚ ለመለም ይኑ ብሄር ኣኽድኒ ይገውና፣ ናን ቓበብኖና’ኽር፣ ሓየምድኖና’ኽር የነው ግን። ሒል ብጅኽል እላ ሒል እምንሊ ህንበኵ። ይን’ኻ እምን እህንበኩና፣ እና ስታት ይን ኒል ጉኖ ህንብናኹሲ’ኻ ይን ከው ደው ይኖሉ ህንበናዅ ኣኽነዲን ና ጃብል ድያዅ እላ። ብሊን ዓቕም ሻኽድኒ የውሲና’ኻ፣ ሺዊኖ ፈርኒሎም፣ እማ ኒን ቅበ ግን። እና ቅበ’ኻ ይና ቁርሊ ካርጊን ለምለም ዩኖ ካያ ሻኽንዅን።


8. “ኣውኒ ካቢሮኩም ግን፣ መቐልኻ ሻክድኑኽማ” የውር ህንበንክ።


ድርጝ ያኹድ ይና ከው’ሲ እምኖ ጉና ህንብናኽር ግን። ኒሰና ይነሰና ዓመጭሰው ሰሳ ሙርቁ ኤርትርው ይና ለመልም መቐል ግን። ይና ኤርትራ ናትከሪ ኣኽርንነዲን ይና ኣክ ኣካሊ ፍትሕዲ ሰላምዲትል ሰየምስሮ ለምለም ይናኽር ግራ፣ ዋኸዲ ቅበዲ መንጎራ ሻኽኒ። ምናዳ’ኻ ህግደፍር ሕኩመት ስታትድ፣ እንግናቲ ሙሩቝ ና ዓዋዲ ድደኩ፣፣ ናብርት’ኻ ሰልብሰው ኣኸውድ ለመለም የነክ እንኩኑኽ። ይግር ናት ቓልኖ ኣኽግኒ ወሪ ኣረጋ ያኹና ዋነ ኣኽጊ፣ ዕምጭ መረሮና ይነብሪል ለመለም ይነኵን። ኣደርስ ጛቑትኖ ምቓቐስ ጠዓበንክ ይሳኽ መስል ሰና ዓመጫኹሲ ዓገብ ይግኒ፣ ኹናመስ ኣኺ ዓፋርሲ ጀበርሲ ኣኺኒ ሃይማኖቱሲ ዓመጭሰውሲ ጀኸው ወሪ ቓበበው ህንበንክ። ገለበበድሮ ጋብ ህግደፍር ጋብ ግን። ካበና ሺውሩ እዋኹሲካ ጃር እውንኩት ዪና ጃር እንከላኽ ግን። ካበና ወንቐረውድ ኣቶብያ ካብረን ሓኩር ሻኽላ። ይግር እማና ካብኑሎ ሰግነኩን፣ ካቡኑናኽር ሰጘነክ። ዪግር ቅሽንልድ ካበና ወንቐርኖ ግን። እወሲክና’ኻ ጃር እውንተት ይኖ ግን። ይና ወረበስ ዓመጫዅድ ህግደፍድ ደኩስኖ ኡግና’ኽር ከለብ እንደርሲ ህንበውድ ኡኖ ኣኽኒ። ህግደፍር ኣቡካቶራ ኣኽና ዳኣም ሰርገልሲ ሺሽደክ ግራ ድርግደላ። ዓመጭሰው ላሓምድኖ ይና ምራድ ግን። ይነሰና ዓመጭሰው ይና ለመለም ጨር ግን። ና ውጥንስ’’ኽር ካነኩን። ሆደ ብሊናዅ ቻርተር ክዳኑሲ (EDA charter) ታለየቲ።


ፊና፣
ይና ሻን ሓይሳንዲ እቴታዲ፣


ኮል ኣኽኒ ቅሽንሊ (continents) መንደርትደና’ኽር ብሊን፣ ግናቲትዲ በህሊዲ፣ ቂልስንኹን ይግድኒ፣ እንተወረበድ ተርህደና’ኽር፣ ናን’ኽር ሆደ ዋኒቶ፣ ወቐቶ፣ እንታ ለመለምዲ እንታ ተውሄዲ ጀረብደኩላ። ሆደት እንተ ተረጚዲ እንተ ወደንዲ እስዲነ ቛልድኖ፣ ዳረምትኖላ ጨበረቲኩም። ለብረን እንታ ለባ ግን ሰርገልደን’ኻ እንታ ሰርገል ግን። ብሊና ጋብሲ ጠፍሕትኖ ለመለም ይደና’ኽር፣ ኒሰና ብሊን ታሪኽ ተብደና’ኽር (researches) ጠበጥድኖ ለመለም ይነኵን እንኹንኹን። ግራ ደምደምድኖልም ኣኽነት፣ ቆል ቱንኩን። ይና ወረበስ ዳርምድኖ’ኽር አርእኖ’ኽር’ሉ ሺራዅ ደርብሲ ድርጝደና’ኽር፣ ይና ሻን ሙሁራን ኣኽድነት ኤርእንኹን፣ እማ እንታ ካበና፣እንተሙኽር ኣኸት ተፋነይነኩንኩም።


ሃይማኖታትሲ መርሕደናኽር፣ እክል፣ እስላምዲ ክስታንዲ፣ እና ይና ብርፍሲ ደዓት እሲትኖልና፣ ተዓየብነኹንኩም። ይነክል ቐሰና፣ እንተቑር ላ ናን ኣኽኑኹን፣ ገውረና።


ይነሻን ውድባተል ህንብደናኽር፣ ተሎትዲ መርሕዲ፣ ሆደ ብሊናኽ እንተዲ በደራሪን ይሮ ምራድ ሻኽላ። ኒ ስታት (ዕላማ) ለመለምሊ እንታ ጨራ ግን። ሆደ፣ ኒ ኣካንዲ ኒ ግንድዲ ኤርእስታዅ ኣኽነዲን ሕበበርዲነ ቛልገሉ፣ ጥዕስ ክበግዲንን። ይነቱር ወረባ ሻኺኒ፣ ናውክ ሻን ግን፣ ዋንትነን መንደርትናዅ፣ ክርነን ኒል ደብትናዅ፣ ይና ሰረና ግን።


ይን ተለምንዅን። እንተል ገእሲኖ ለመለም ይንኵን። እና ወረቕት ኒስ ነበበው፣ ውሪ ይና ብርፍሲ ዋሰው፣ ና ዋጅብ እሰገነን ሕይምንተ ወረቢዅድ ንደንቢ ወንቐርሰው ናው ግን። ስድቕዲ፣ ብርዲሲ ግን ይነክል ወረበስ ለዊስናዅና፣ ጋብዲ፣ ዕሕ’ዲሲ ናይ ኣረርሰላ፣ ሓሶሰይንን።


ተሎት (ኣባላት) መዝገብና፣ ና ዋጅብ እስና፣ ሆደ ብሊናዅሲ ኤሪውዲ ኣለለይስና፣ ካበና ሞራል ኣኽኒ ማሉዅ፣ ኡን’ኽር ጀረብና’ኽር፣ ንደንቢ እንተ ሙነት ግን። ድራር ሻንኹ መቕርሕና፣ ጭጉማን እንተሻንሲ ካብና። ዓዳት ይነውሲ ኣብሑር ቁርድ ቛሊስና፣ ይና ጋብሲ ሉሑማንድር፣ ጎወሊት’ድር፣ ምህሮስኽር ዳብርድና፣ ናትክ ቛላዅ ኣኸውድ ንደንቢ ደርብ ብስቶ ህንበኵ። ክዳን ተሎዲ ኣኽሮ ህግደፍቲ ለመለም ይና እንታ ዓይብ ይሳኽ ኣኽላ። ጃቢቶ ክድመትል ድየው ማሕበራት ብሊነው፣ ዓዋዲሲ ኣኺኒ ሃይማኖትድ፣ ሸልድ ይና ሳቡርዲ ይና ካብነዲ ሻኸው ኣኽነት ጃቢስኖ ድውነኩንሎም። ናውር ና ዲቢል ሆደ ብሊናዅድ ና መቕርሕ ኡድኖ ተሎትዲ ማርሔንዲ ኣኽድኖ ጨበርነኩንሎም።


ሆደ ናትክ ብሊንሲ ነሳዅ ኣኽኒ ኡሰሪ ተሎት ((members) ኣኽትኖ ወንቐረቲ። ኣመሪ ጉባኤ እኽኒ ዲባ እስረን እንር ወረቐትል ህንበውሲ ግን ንሪ ሽጝራዅ። ኒን ኣኸውድኻ፣ እንትን ህንብደናኹልድክ መቕርሓ’ኽር፣ መቕርሕሳኽር እና ገሽ ወክትሪት’ኻ (preparatory committee) ኤሪ ደርብ የመምናሲክ ኢሜይልድ (Email) ኢርትኖላ ተዓየበቲኩም።


ሆደ ናትካ ሙኽርዲ ናትካ ስረነዲ ግን።


ይና በለድ ኤርትራ፣ ብራ ኣረክዲ ፍትሕዲትሪ ኣኽርኒ።


ንዲ እንተ ዳሕነዲ፣ እንተኣኾርድ ኣኽኒ እንተደሄይ።


ወክትሪ ሽማግሌ፣ ሆደ ሙርቛ ብሊናዅ። 11/11/2009
ንድ This e-mail address is being protected from spambots. You need JavaScript enabled to view it ኤርትኖና፣ ጨበርነኩንኩም።

Last Updated on Sunday, 15 August 2010 09:58
 

mod_btslideshow

Saturday 19/12/2020 Live stream on 20:30 Berlin time.

Who's Online

We have 157 guests online