ሆደር ሕላን

ዪና ከው ሰላምዲ ፍትሕዲት ኤርዶ ኤመታት ለመለም ዪንዅን። 1991 ዲስኻ፣ ጨዓትኖኽር፣ ተዓብኖኽር፣ 70 ሲሕ ኣከው ሪሕ ከፈልኖኽር፣ ጀበረትሲ (ናጽነት) ንር ፊኹል ገእ ስኒኹንላ። ሰመስ ናዕ ዬኔካ ጃርሲ ሓምድንኹን። ቋሕ ሰምትልኻ! ኮዶ በላሊሶ ኣኹኹና። ህግደፍ፣ ወረቐትል እርገውዲ፣ ጀመርሱ ሰገውዲት፣ ዪነከው ኒል ክርነውዲ ፊነስ ባሮ፣ ዉጅውና ቂጦሪዅል ሰሄርሱዅ። ኤዪ አርትሪ-ኹራ፣ ጀበረት (ናጽነት) ደንቢ፣ ኒ ድብለስ ቀጥ ሰ እና ዪና ኮሊት ኤሪ ኣቕሩንዲ መጢስሮላ ሕላን እርጉዅሉ። “ይኽርዲ ይገነዲ ናት ናቱር ጠሎት” የነሰና ደሽክሊ፣ ይነዲ፣ ኣቶ ኢሳያስ ድር ጠሎት ንትኒቱ ኣዅኽ። ኣቶ ኢስያስ፣ አዋሃበ ቂጦሪል ኮፍ ዮ መንደርትሮ፣ ተኸትል ወጥን ብርፍ ያዅ እርግላ። “ዪባ ፍንጢረት ቋለኵ፣ ፍንጢራኻ ጠጠመስ ካይ ቋልዱ አብ ዪቢኹል ትወቲ” የና መሰልሰና ይጝር ጀበረትሲ ካያ ቋልኑ ናን ዲክታቶሩዅል ለብንዅን። ኣቶ ኢስያስ ኒ ስልጠሲ ጠፍሕድሮ ከደን መኸልትነሰና እሲዅና። እንሽኽሲ፣ ላውዲ ሽንገብዲሲ ኮስኮዱዅ። “ወረርስንዅን” ጠለምስንኹን” የካ ከለንቡራ ጠዓንቡዅ። እንከሊ ኮሊሩዅ እርግነዲንንኻ ኒ ጎልዪል ሳዕሲዕንዅን። ሻሎት፣ ኮሊት ጃቢስድኖኽር፣ ፍርዕድ (ዲሞክራሲ) ልምድኖኽር ሳድነውኻ፣ ላሪ እምን እንጋዅ ላኺል ቱሱዅሎም። እክብስጋ፣ ረኤ ኡጋ፣ ከተብጋ፣ ወንቐርጋ፣ መእኮትሲ ባራ፣ የካ ኮሊት ንርትክ ማሕቡስ ለወቱዅላ።

ሸንሃት ኮሊሩኹሲ 1991 ፊልምሰና ወንተስኖ ቛልንነን ንኪ የውዲ ጎዱግዲ ኣኾ ህንበኵ። ንየት ኮሊሩዅ እርጋዅ፣ ከአርኻ ብትነድ ኣካንሲ ባርዶ፣ ዕምጭኻ ፍትሕድ ሰፈፍስሮ፣ እንሽኻ ሰላምድ ሰዓርስሮ፣ ሸንህስትኑ እርግነውሲ ንኪ ከአርዲ፣ ዕምጭዲ፣ እንሽኽዲኻ ዪና ወሸቓ ኢሲዅሎም። ዪና ኮሊር ሳዳ በነኖ ከብቲነዲን፣ ጃር ረሀይድሮና፣ ሰሚል ናዕ ዪነክ ሺውነኩን እንኵንዅን።

ሆደር ሕላን ኮዶ እና ተምኔት ከው አረትሪውዱ ዓቖሰና ብቑተውሲ፣ ወንተስቶ ግን። ጃር “እንታ ስድቕድ መንደርታ ዩዅና” ብሊንኽር ደኵሮና ኣከን ላሕመዲ ፈሀምዲሲ ዲባ ሻንዅ እስነ ከደምኖኽር ለመለም ዪኖኽር ዪና ዋጅብ ግን። “ረቐበጋዅ እዃርስጚኒ” የነኵ ዪና ክል። ረቐብና ሓሳደት ኣኽላ፣ ሆደ ረቐበቲ። ዪና ከው ናላው-ናንድ መቕርሕድኖ ረቐብነኵን። ኒል ጋእ ዪኖኻ እክብስኖ ሻኽንዅን። እክብስጋዅሲ ወላውል አደኩሉ። እክብስረንኻ፣ ኮድጘዲ ሕልዲ እንተረኵ። ኒሰና ሙቑለስ ካርዶ፣ ኩሽቲ ኣኽሮ፣ ኩ ወረበድር ኣክረኵ።

ሆደ ሙርቛ ብሊኑዅ እክብስንን ዪሩ፣ እክብስንን እክብስኖ፣ ካብራን ዪና ክልልሰና ኣኽኖ፣ እክብስነን ኮዶ ዪና ኮሊትር ሑር እሲኖ ግን ንሪ ይራዅ። ንኪ እክብስግኒን መንጎራ ፈጠርና አርእብና ካያ ኣኽላ ሕውጝር ህንበኩሉ። ኒንኻ እመሪስኽር ጥዕስ ፋጋዅ ግን። ገለገለክ በላይን ናሹር ነፋዕ መታን ኮልትል ወተተርድኖ፣ ሆደት ንዓለንኵ። ሕኩም ኤሪትሪዅዲ፣ ህግደፍዲ ዅ ጣልሜን ግን። ጣልሜንዲ ወንዲታዃ፣ ብሪል ሕውን ሰሚልኻ ለኻ ጨበረኵሉ። እንኩሊ (ውድባትል) ህንበው ዪና ሻንኽር ደይዕኖ ብሊናር እክብስነስ ጀረበኒ፣ ብሊናርድ ጋቢድኖ ስማረው ህንበነኵ። ኒንኽር እክብስኒል ጨገም ግን። ሆደ ብርፍ ዪራዅዲ፣ እክብስንን ዪራዅዲ፣ ወረባ ነፍስዕሮኽር ከበርዶኽር ሕላን ግን። ኒንኻ ናትካ ነፍዓት ኣኽነዲን፣ ሸኺዲ ቐሺረዲ ፈላሲዲ ከብተጝኒ፣ በልጝኻ ጠሎትድ በልኻ ክድመትድ ካቢድኖ ጨበርሰንኵ። “ዪከውሲ እንከሎኵን፣ ዪ ወረበስ ከበርደኵን፣ ኣን ብሊና ግን” ዪረክ ጋብድ ካያ ፋሺትና ከብተ ብሊና ኒ ሙዅር  ኤድሮ ህንበኵሉ።

ሆደ ሙርቛ ብሊናዅ፣ ዕሙጫንድ፣ ጭጉማንድ፣ ና ናይ መንተልሰውድ፣ ጊብ (ዋልታ) ግን። እና ጊብ ኒስ ሓንፈስዶኖ፣ ጃቢቶኻ ኣቶብያ፣ ናንኻ ህግደፍዲ ናይ ሙሩቑ እምነገውዲ ቂርዲ ገርክዲ ሓለነነኵ እንኵኑዅ። “ሻናርዲ ላሕመዲት” ጎሊቱኑኻ ዪና ነብክል ትወንኵ። በካይትሰናኻ “ኮሊት ሰልፍ ቋልንን” የነኵ። ቋላዅዲ እሳዅዲ ዋነን ግን ሰልፍ ኮሊት ቋልንን ይረኵ ግራ ከውዲ ዓዋዲዲ ወላውልዲ ፈሩ “ኮሊ” ይረክ ጨርሕና ልውር ሻኽላ። ቂጦራ ጀርብ ግን። ዪና ዋንትነስ ዕወለል ገምድኖ “ዉሁራን ኣኽኖ” ተሚሰላ። ሓቕ ሻዅ፣ ሰልፍ ኩከውሲ ኣኽን ኩ ዓዋዲት፣ እክብሩ፣ ላሕማ ኤሪ ገባይልዲ እስረ ለመለም ግን ጥዕስደጋዅ ሓርነት ደርብ።

እማ ሆደ ሙርቛ ብሊነሪ፣ ብሊን፣ እክብስንን ዪረን ሙቑል እሲላ። እክብስነን ግን ላሕመዲ ሻናርዲ ዪና ናይዲ ዪና ወረቢል ተባዅ፣ ኮድ ሰላምዲ ፍትሕዲ ዪና ኮሊትል ሰርገላዅ። ህግደፍ ለበን፣ ዪና ኮሊት ጨገም ገምሮ ግን ዪነክ ጋብነኵን። እማ ከደን መንደርትናኽር፣ ዪና ወረባ ጨገምል ገምጊን ንኪትልድ እክብስነን፣ ዲባ ሻኑዅ እስነን፣ ላሕማ ዪናዅሲ ክድመትድ ቋሊስነን፣ እንተረው ቐብሲ (ሽግር) ካርኖ ቐደርነድ እምኖ ሻዅንዅን። ላር ሄበጝኒ፣ ዶለር ቆደርኒል ካያ ከብትነጛ እመሪ፣ ዶላር ከውዲ ዓዋዲዲ ብረዲ ኣኽሮና ኣኽላ። ኒሰና ኤርው ጉርበሲ ካያ ጋጝነን፣ ኮዶ እመሪ እሪ ከው ዪና ጨገምሲ እንክድኖልና ኣኽኒ። ኮዶ ላዅክ ኒ ጨገም ተበኵሉ። እማ ዪን ሙኹር ወረቢው ኣኽኒ ወረባ ጨገምሲ እንክኒልኽር ፍንሕንሕ ዪንን። ሆደ፣ ናን ትልድ ዪና ፈሀምሲ ላዅ ኣስኖ፣ ናትክ መቕርሓዅ ማእኮትል ቱኖ፣ ሻን ዲባ በሎቲከድር ገድድር፣ ዓዋዲስኽር፣ ገደዪሳዅና ነደቕቶ ለመለም የቲ። ሽማግሌ ኮድናኹሰና፣ “ኩራ እንትጚ መገለይ ኩሪዅ እሲ” የነሰና፣ ከርተፍ (ትንሳኤ) ብሊናኹሲ ሓለንትንን። ንኪት ነፍዕስንላ። ንኪ ግን ይነሪ። እመሪኻ ጃርድሪ ግን።

ኣዳም ኣዳሚንዱዅራ ኒ ወረበድ ሰሀርዶ ኒ ዋጅብ ኣኸት ዪን መንደርትነው ኣቕሩንልድ መሀርስኖ ቐደርነኵን። ዪና ክልኽልር እክብሰገው ዲ፣ ና ወረበድ ከደምገውዲ፣ ተሓረብገውዲ፣ ላሕመድ መንደርትገው ዲ፣ ኣከነን እና ንኪ ዪን ኒድ ጀመርናዅ ብሊናርዲ ወረበዲ ዋነጊድ። ፊና ዪና ክልላዅዲ መኾኽዲኻ፣ ዪጝር ዪና ቁርሊ፣ ብሊናርስኽር፣ ዓዋዲትር፣ ብረስ ካስኖ ወንቐራ ሻኽጋዅ ሙኹር ሻኽንኹንን። ኒስ እሰግነንኻ፣ ድጝምል ሓዋናን ይስኖ አልብስኑ መንደርትኖ ግን። እማ ዔብ ዪንን። ብሊና ኒ ሕልነስ ዋሰንታ ሰገኵ። እማ ርሕዲ ፊኹዲት ዲሂስሮ ቐድራዅል ጃርሊ እምኖ፣ እንከሊዲ፣ እምንዲሲ፣ ክድመዲ እክብስነዲሲ፣ ዪና ለበከስ ብድንን። ዲክታቶር ሓጨፍስሮ ግን፣ ኒ ኣካንልኻ እምንድ ፍትሕዲ ሰላምዲ ሰርገልዶ፣ ናትልድ ሕላን ሆደሩዅ ዓውቲትሮ ለመለም ዪንን።

ሆደ ኔስ የቲ፣ እንተውስኽር ዪትኖ ጨበረቲ። ኒዲ እንታ ዳሕነዲ።

ሰርገል ሙሩቕ ለመለምሙዅድ!

ሆደ ሙርቛ ብሊናዅ፣ ለንካ ከበርዲ ምህሮዲሩዅ፣
Friday, June 17, 2011