blina.org. ብሊና

ፍሪዕ እክባ ሙርቛ ብሊንኹ

ድሪስ ገዱዅ ሓዲስ ኤምራ

ናትክ ከው አሪትሪውሲé ጅዊልኽር ዲያስፖሪልኽር መንደርትደናኽር ሲ፣ ፍሪዕ እክባ ሙርቛ ብሊንኹድ ጨርዲ ሰሃርደንኽር ሲ፣ ናትክ ዓለምስክ ኪዳ ኤመራ 2013ዓም ኢስሮና ዪና ተምኔሲ ጃቢስነኩንኩም። ዲን (እምነት) ክርስትና እምነውሲ ልደት ሰላምዅዲ ፍትሕዅዲ ኣኽሮ ተምኔትኑ ክዳ ልደት ይነኩን።

ዪና ከውድ ኣኽኒ ዪና ኮሊሩኹድ ገሪው ከተብሰውዲ ጋብሰውዲ ኣኸውድ ኒድ ከተብና ንኪ ቋልስተለና። ከተብሰውሲ ሓየብኖ ቋልነን ዪና ኮሊ ንኪ ክረም ህ.ግ.ደ.ፍ መቅርሕድ፣ ኮድረክ መግደርደትር ጨነትረትር ናው ናላውድ እምነናዅ ሓቕ ኣኾ ህንበኵ። ኣኻ እቑሹንድ ሓየምረትር ን ደብኽር ሳዳ ዋኒገትላ፣ ቋሊሳዃ ና በህሊጝ ውሪ ምራሕቲ ናው ከብተጝኒ ጠሓልደሪ ባቡር ህግደትሪትል ባንጙረክ ገመው ጅምለድር ነፈርድር ንኪረሰና ኮሊት ባሮ ጋይተው ብጅኽ ቋልሶ ኤርላ።

እን መርሆ ኣዋኸ እንትን ያኹል ጀወልኖ ገለ ዪና ረኤይ ሲ ፈይ ሲኖ። ብሊን ነበክል መንደርተው ና ኣክነድ ናትካ ጂጘስ ኮዶ ዋሰው ና እክነድ ናው የነውሲ ስዳውድሮ ቋልስሮ ሻኽላ። ዪን ከተብነውዲ ዪን ተምኔትነውዲ መርሆ ከው ጀረበውዲ ብሪል ህንበውዲ ግን። ዪና ዓዋዲትልድ ብርፍ ዪናኽር ኣኸውድ ክብርድር ሕሽምድር ግን ዪና ረኤይሲ ዪን ኡናኹ።

እና ናን ህንብናዅ ኣያምሊ፣ ኣኾ ኣካልክ ኣኾ ከውክ እና ዪና ኮሊት ኣዋሃብነ ዳሕኒስንን ያኹ ወንቐራ ገርገሮ ህንቦኵ። ኒንኻ ክብ ልጠቕ ዩ ኤርብያታተልድ ወንቐርሱ ድየዅ ኣኾ ኮዶ ንኪር ቂር መልሲ አርጋኹ ውነቐራ ግን። ጀበረት (ነጻነት) 1991ዓም ደንቢ፣ እና ወንቐራ ኒን ሕሳንዲ ፍትሕዲሲ ድጙትስሮ እርጋዅሉ ግን። ጣልሜን ና ጉግ እኽጋዅ ኣኽነዲን ኻ ወንደፍንኑዅሉ። ጂባዃ ክረም ህ.ግ.ደ.ፍ ምንደርትሮ ኣከን ከው ኤሪትሪው ሕሳንድር ፍትሕድር ናጨገምሲ እንክድኖ ሻኽኒ ያዅ ኒ ጉግ ኣኸውድ ኮደክ ፋሕ ሱኹር ሙሩቑሲ ጨንትዱኽር እምነታትሲ እኺርኺርሊ እሱኽር ፈርነዲን ንኪ ኩሱሰን እን ናልድ እኳርስኹን የውስኽር ጨመሮ ናትክ ላጘስ ጨነደኩና እንኩኹ።

እና ኤወት ስኩርደሪ ወንቐረት ላገሽ ኣኽኖ፣ ወንቐር ጝኒንኽር መርሆ ኤርግኒንኽር “ኣን የሪት ዋሳ” የው ክረም ህ.ግ.ደ.ፉ ካያ እኽግኒ፣ እና ረኤይ ንሰንስ ሻኾው ለመለም ጅዊልኽር ዋኒኒነዲን ንኪር ቂር መልሲ እረኒላ። ኔን ኣኸውድኻ ዪና ነበክል ሕሳንዲ ፍትሕዲ ዋኒጋዅ ኣኻዅድ ዕምጭልር ምጨትልር መንደርትነኩን እንኩንኹን። ክረም ህ.ግ.ደ.ፍዲ ኒት ተከውዲኻ ብሶት ኤርኖ ስልጠትል ህንበነኵ።

ኤሪትራዊራ ኮልር ዲባ ፈሪዕ ልውቲዅ (ኤርትራዊ ሃገራዊ ባይቶ ንዲሞክራስያው ለውጢ) ደኳኹ ኤርብሊ ነበካ ዲባ ሊጘርሊ ኒ ግሲትል ንዓቕምሲ ኣኽን ኒ ጨገምሲ ቋሉ ተቓዅ ሽንክራ ዲቢል ገምዱዅ። ዲባ ሽምግሌ ነወያዅ ሽንክረስ ዲብል ገምዱ፣ ሰልፍ ኒት ቃለውዲ ኣኾ ሽምግሌስኽር ኣምራንድር ነበካ ስምምዕ እንትሮ ለመለም ዩ ከውሲ ኽር ሓበሮ ረኤይሲ ጠፍሕዶ ሕሳንድ ደዃዅ እሲሮ ኒ ምኹር እርጉዅ።

ኤብነስትሰና ጉድናዅ ሊጘር ግሲት ዲባ ኤሪትራዊራ ኮልር ዲባ ፈሪዕ ልውቲዅ (ኤርትራዊ ሃገራዊ ባይቶ ንዲሞክራስያው ለውጢ) ኤመራ ኣቍታኹስክ ጨጋማት እርገውሲ ቋልኖ ሓዲስ ግርብል ውራ ዓመምኖ ህንባዅና ዪጝኒ፣ ላዃ መስከረምትል ዪና ሻን ደመሓኵኤ እኽርዲ ብርፍ ሰዅዲት ፍዲታዅ ሓምድ እድሪስ ዓዋተት ተጻረራኹ ፍድናዅ ና ረኤይል ስለፈስ ባርኖ ዪና ጅዊውሉ ገሪ ወክት ደኵሱዅ።

ዲብል ገሞ ደንብኻ እን ምጉት፣ ኤውኒ ኒስ ጉድኹንሉ ውሪ ኒስ ጀረበለሉ ኣኽጚ ዕቡብድ ኤዋሃብነ ዪና መዓልድ እርግስንንሉ ያዃ ነብካ ፈሄም ዋኒሮ ዲባ ዓዋዲ አምርድ ሻኽኖሎም ዋኒግነት መሀርስንዅን። ኣና ኤምር ኒን ነቀስድንነዲንኻ ከው እና ሆደትል (ሰውረት) ሺረኵ፣ ሻሎትኻ ሓነንጝኒ ዓንቐፍሰነኵ እንኩኑዅ። ናግር እንቲ ኣን ዪ ግኒ ፍትሕድር ሓሳነትድር ዪና ጨገምሲ እንክኖ ናትካ ሙኹር ኣኽኒ።

ኤሪትራዊራ ኮልር ዲባ ጀረብደት ናውክ ኤርእንኹን። ይነትነቱ ኣኽኖ ከድምስገትር ቋልኖ ህንብነኵን። ንድ እስነ ዪና ከው ፋሕ ዮ ህንበውሲ ላ ዲሞክራሲራ ዲብል እክብኖ፣ ሻሎት ደርብል ክረውሲ ዳሕኒስኖ፣ ኒ ብሀርዲካ ህ.ግ.ደ.ፍቲ ላ ብሶት ኣኽኖ ልብድኖ ዪና ከዋ ፊና ኣኸውድ ቱኑዅንሉ። ዲባኻ ኔስ ኒ ሕላንድ ኣኽን ኒ ክድመትድት ኣኽን ቋሊስሮ ህንበኩሉ። ዪጝር ውላውልድ ኡጝኒሉ እዳናኹ ብሶት ዲቢል ውንትነት ፈሄምኖ ህንበኩና። እዳናኹ ብሶት ዲቢልኻ ተሰምሚዕለውርክ ሕሳንዲ እምንዲሲ ከደምሩ ተሰማሚዕግረውልኻ ደፋእ ዪሮ ወንተርቶሎም ብረስ ጠፍሕድሩ ጂቢቶ ዋነትና ዋነት ስርዕ ለመለምየንቱታናዅ ግን። ዪን ዪና ብርፍል ህንብናኽር ባራ ኢያማት ዲበድ መንደርተው ኮላት እና ጨገም ንሰና ህንበኩሎም። ኣሜርካ ኣና ናን ህንብናኹ ኤርቢል እን መቕርሔው እክብ ገድ ፋስካል ያኹድ ስምምዕ ብንነዲን ስምምዕል ጋእ ይድኖ ሽማግሌትል ሽማግሌትል ኮለል የነኩ እንኩኑኹ። ዲሞክርሲ መረራኹ ግን ኒልድ ታምታኹር እላ። ዪና ክልልሲ ቋልነን ና ኣጭጉምሲ ሽማግሌሲ እሲነ እንኩኑ ዲኒኹ። ይግር እና ትክያኹ ዓዋዲ ዪና ክልለውስ ኣማበልድኖ ከደምኖልም ህበኩና። ኮዶ ኣኾ ሽንክረክ ሰልፍ ቋልሶኽር ቐየስቶኽር ገምሮ ዘተ ክዋኹዲ ኮድጛ ኣምራናዅድ ሻኾ ዲብል ገምሮ ሻኸት ኒልድ መሄርስኖ ፋነይነኵን።

ፍትሕዲ ሳላምዲ ዪና ኮሊትር ዓንበብሮ ዲባ ዲሞክራሲራ መተካእታ እለሉ። ኤሪትራዊራ ኮልር ዲባ ፈሪዕ ልውቲዅ (ኤርትራዊ ሃገራዊ ባይቶ ንዲሞክራስያው ለውጢ) ወረና ዲሞክራሲሩዅ ኣኾ ወንቐርሲ ፍትሕድር ዲሞክራስኽር እንክሮ ለመለም ዩ ኒ ጂዊል ህንበውሲ ኣክቦ ከደን ህነውሲ ጋበልድሮ ናትካ ሸንሃዲ ሙኹርዲ ግን።

ሲደውሲና ሙኹርኖ እኽርኺርሲ ሓሸምድኑ ሰልፋ ኣባይሲ ንዕምርሲ ድርጝድኖ ዲባ ዪናዅሲ ጃቢስንን። ኮዶ ኮሊር ሰላምዲ ከዋ ክብሪዲት ፈሀምድ ዓትዓትኖ ለመለም ዪንን። ሕግኻ ናትካ ኤወይሲ ኮፍ ዪሮ መሽግኒ ከደምንን።

2013 ዓም ሰርገል ለመለሙኹዲ ፍትሕኹዲ ኣኽሮና ተምኔትነኩን።

ዪና ፍዳታት ዲምክ እልብርስናውር ከበርናውር!!

ክረም ፋሺስቲ ህ.ግ.ደ.ፍ . ኒ ዕምር ድርጝኒ!!

ፍርዕ እክባ ሙርቛ ብሊነሪ 12/25/2012