blina.org. ብሊና

24 ግንቦት 22 ኤመታት ጀበረቱኹ ኣብ-ዓልድንኩን። እና ውሪካ ጠርስዲ ተዕባዲ ክረዲሲ ኤርናኹ ጀበረት፣ ተምኔትናኹሰና ፈርጚን ክረም ህግደፉኹ ጮጮዮሉ ዋነት ናውክ መንደርትናኹ ኣኸውድ ገሪው ጋብር ጀረብደለና። ንኪር ጂገዲ ንኪር ቋለዲ ኤወሃብነ እና መዓትልድ መሓርስንን ኣኽሮ ህንበኩሉ። ሻሎት ዪነው ሸሺል ፈድረው ሰና፣ በልጛ ወኽደም ዕስክርኒኹል እመሪ ደኩረና የጝናኹ ጭልምል መንደርተነኵ፣ ና በጝኻ እና ወኽደምልድ እግርድኖ ዓደል ፈታሕ ዳዱኑ ሲናትልር ሊብዪልኽር ባሓርልኽር ቱዉኑ ሃጋይሊ መንደርተነኵ።

ሸቓላይ ኣኽን ኤረሳ ፣ ናጋዳይ ኣኽን ተመሃራይ፣ ለጘትረጝን ኤመራ ሱቐይስክ ስላሕ ሙኹራ ይስኖ፣ ከድምኖ ኣኽን ጎዲነ፣ ሸቐጥኖ ኣኽን መሄርስኖ መንደርትክኒን ገበብስኖ በከታ ራሕመትድ በዳን ወክሲ ደኩስጝኒንኻ ራሕመተውሲ ዳገኖ ኮውሲ ዓዳብል ገምዶሎም ዋነት ዪና ከውኻ ዋዕ ያኹሉ ኣቅሩንኻ መስከረናኹ መንብሮ ኣኾ ዋነት ሰተርሳኹ ኣኽላ። ብሊን ና ወረባ ባሓርልኽር ኣኽን ኮላዲትልድ ግንዲሲ ጎሪተጋኹ ኣኻኹድ፣ ንሂሲ ሰንዖ ደኩሮለ ጝን ያጋኹ መንብሮትል ጠል የት ምኺርትና ዪኖ ሳድነሊ።

እና መንብሮ ኒል መንደትርናኽርዲ ቃብሎሲ መኸልትንኽርዲ 24 ግንቦት ጀብረትሲ ብዓልድናኽር፣ ሕላን ሆደሩ ተከውስገው ኣኸውድ ኒል ገመኖ ህንብናኽር ኣኸት ናውክ ኤርእናኹ ኣኽወድ ኒን ደኩሮ ሕሳንዲ ክብርዲ ኮሊትር ረትዕሮ ውራ ሄብኒን ያኹ ጂጋ ዪና ነበክል ገሞ ህንበኩ። እን ሓቖቓይዲ ከዋዅ ሹኹሸጋኹሎም ገንዳ ህግደፉሲ ባርኖ፣ ዪን ሸዓብ ኤርትራው እክስናኽር እክብስጝናኽር ጅር ኮኹ ሻኽንንኹን ዪናኽር ዪና ባብዲ ክድጝኖ ጀረብዳኹ ወክትል ህንብነኩን። ባብሲ ብርብርኖ፣ ፍንሕንሕ ዩኖ፣ ዪና ደርብሲ ጨረግኖ፣ ሙኹርሲ ኒ ፊኾኒል ገእ ሲኖ፣ ፊና ሻኽንኹን።

ሓዪሳን ሻን፣

ራእስ ክረም ህግደፉኹ "ጊንዲ" ዪናኹ ኢትዮጵየዲ ብሪል ገድእጊ እና መናበረት ከዋኹ ለውትሰገት ኮደክር ጂብሮ ኣኸት ብዓል ኣካናትልክ ረድዮስኽር ድመክ ጋቤት፣ ዋስኑኹን። ኢትዮጵየዲ ሰላም እሰጝር ኤሪው ኣፋይቲ ቆቆለት ትክሰ ኤርእንኹን። ኒጠባዪዕ ሲ ቋልነን ለውትሳዅ ኣኽገት ናውክ ኤርእንኹን። ሸኮሮ ህንባኹሰና ላውዲ ሸንገብዲሲ ገጋዕ ዩ ኒ ቂጦረስ ተከወት ከወልሳኹ ኣኽላ። ብለድ ሰላም ኣኽሮ፣ ከው ሑር ኣኽድኖ ለመለም ንኻ ኤሪኹ ፈሪር እግግናኽር ኣኽነት ኤርእኖ ኒስ ኒዕምርሲ ድርጝድኖ ሙኹር ናትካኹ ኣኸት ከቲኖ ሽኽኒ። በላይን ና ከዋት ኤሪትሪውዲ ለሓምኖ ና ዋጅብ እሰነት ብሪል ቃልሳኹ ሓበንዳኹ ግን። እና ሓበን ኒስ ሳኹስኖኽር ዪና በነስ ኩድኖኽር እና ግርጋ ኒል ቆል ቱነሪ ጝን። ሕሽምዲ ክብርዲሲ መንደርትኖ ክርነጝር ሕሽምዲ ክብርዲሲ ክርኖ ኮዶ ዪና ኢውርናርሲ ተብነጝር ጃቢስነጝር ካያ ኣኸት ዪነልድ ከወልሳኹ ሰትር (ሚስጢር) ኣኽላ። ኣዳም ኒ ከውሲ ሓብሓብጚ ኒ ከውሲ ሻጚ ድንጋ ፍሮ ወረባ ካርዶ ሓሰብሰጛዅ ጝን።

ዪና ወርባ ኢትዮጳይ ጦርዲ ኮማንድስ ዲሲ ላ ወክትል ኒ ድጋታት መርጃኹሳኽዲ ኒ ከው ጥይረት ለበደውሲ፣ ልሽክክ ለከምሲነክ ሺንሺሰና ክረውዲ፣ ሆደትልኽር ገሪው ሻሎት ፍዳታት ከፈልነሪ ኮሊትል፣ ንክኻ ህግደፍድ ዳስኖ እመርኻ ኮዶ ዪና ናይ ዲ ዪና ዋንትነዲት ወንደፍረሪ ኤረትራ፣ እንትቶ ዔብ ጝን። ኒን ኣከንኻ ኤሪውሲ ልኽናኹ ኣኽጚ እና ናን ዪና ርሕድ መንደርትናኽሩ ሕምቕ ካያ ጝን። ፋሪዕ እክባ ሙርቛ ብሊኑኹ ጊብ ብሊናኹ ጝን። ጊብኻ ሻከውዲ ተከወውዲ ኒ ከው ጝን። እና ጊብ ኒስ ናውክ ደውሲኖሉ ዪና ዋጅብ ኣኸት እና ግርጛ ንሂትል ቆል ቱነን ሓበንዲ ክብርዲ ተለይሮና ጝን።

ሓዪሳን ሻንዲ ኮሊ ቁርዲ፣

ህንመት ዪን ህንብናኹ ኮሊ ቁር ባራ፣ ከደንድ ኣኾ ቋለውድ ሰሄርዳኹ ኣኾ ዋንተት ዪና ኮሊሲ ከተብሰውሲ ነበብድነኩን እንኩንኹን። እኳርሳኹክ መንዱቕ ሙኽራኹላ፣ እንሸውሳኹክ ሓቐቓኹላ፣ ስርዓዲ ዲበዲ ሻኽጝረሪ፣ ንር ሻሎትሲ ና ሳዳስ ሓረርደሪ፣ ጋይስረሪ ክድረሪ፣ በሎቲከድር ርድቕድር ዓዋዲስኽር ደንቢራ ሸሓግረሪ ኣቕሬን ጃብል ንርገሽ ለብረሪ በለድ ጝን ዪን ሻኽነሪ። ንር ላብነዲ ንርጉነዲ ኒውክ ወዮ ኣኾ ህንበኩ። እና ጨገም ኒስ ካርኖ ኮዶ ለመለም የንቱታት ላሕመዲ እኺርኺር ሓሸምድነዲ፣ ሰልፋ እስታት፣ ለመለምኹሲ፣ ደረክነክ ዪና ሙኹርሲ ሙኹርግኒን ጀውልኖ ህብነኩን። ላኹክ ሰደድሰክ "ኣን የሪት ዋሰለ" ኣኽጋኹ፣ ፈርዕድር (ዲሞክራሲስኽር) ሓሸምድር፣ ኤድሮኽር ኡሮኽር ሻኹኹ። ኣና ሙቑል ዓዋዲ ህደፍዲ ደብሲሮ ህንበኩሎም። እኪርኺርሲ ቃበብነዲ ሽጙድነዲ ደው ዪሮ እና ግርጋ ኒሂትል ቆል ቱና ህንበኩን። እማ እና ፊና ሻኽነሪ ኮሊት ደሓንድኖ ናውክ ዪና ዓቕድ ፍንሕንሕ ዪንን። እና ገሞ ህንባኹ መዓትሲ ለመለም የንቱታዲ ላ ገሽ ኣኽኖ ለመለም ዪኖ እስታት (ዕላማ) ፋሪዕ (ዲምክርስያዊ) እክባ (ውድብ) ሙርቛ (ብሄር) ብሊኑኹ ግን።

ዊሪኹ ይደነን ዪና ወረባ በረሰኩ፣ ዪና ከውኻ ረመጭሰኩ ኣኸውድ ኔስ ጃቢስኖ ዋነትና ዪና ዲቢል ደኩስናኹ ብይን ኣኸውድ ዕግርግር እክቡኹል (ውድባታኹል) ዪና ናን ሕበርነሊ። ንድኻ ግን ዪን ፋ.እ.ሙ.ብ.ኤ ፋሪዕ ኮሊር ዲባ ኤረትርኹ ልውታ (ዲሞክራስያዊ ሃገራዊ ባይቶ ኤርትራ ንለውጢ) ኒል ቱኖ ዓንበብሮኽር ከብተውሲ ሕበሪሮኽር ዪን ቱናኹ። ጀረብዳኹሰና ከደማኹማ ዪነን ቆልዓ እጀጚሩኹሰና ንኽር ንዕምርሰናኽር ኒ ከውሰናኽር ተተይ የኵ እንኩኹ። ፋ.ኮ.ዲ.ኤ.ል ከደምሮኹር ንእስታትሲ ዓመምሮኽር ዪና ካበና ጀረብደኩሉ። ዪን ላሪ እስጝኒ ኒት ገፍገፍና (ምንቓፍ) ካያ እክነን ሰርገልኽር ኒ መጡ ሺርዶ ኣኸት ከትነሊ።

ሓዪሳን ሻንዲ ኮሊ ቁርዲ፣

ለመለምየንቱታዲ እክብስኖ ላሕመዲ ሕሽምዲሲ ዪነልድ ጀረብዳኹሲ እሲኖ ፋነይኑ፣ አመራ እንተራኹ ሰላምዲ ፍትሕዲ ነገሳኹል፣ ኣዳሚንዱኹራ እኩላ ኣኾ ስገረሪዲ ኤተየሪዲ ኤረትራ ኣኽቶንላ፣ ሑር ኤረትራ ሳድነኩን። ኪዳ በዓልዲ ኪዳ ጉግ ለመልሙኹዲ ተሚኔትነኩን።

ፋሺስቲ ክረም ህግደፍሩ ጨደፍድኖ ጝን!!

24 ግንቦት ዪና ዕማምሲ ሓድስረሪ ኣኽርን!!

ፋዳታት ዲመክ ከበርናውር አልብርስናውር!!

ፋሪዕ እክባ ሙርቛ ብሊኑኹ፣ ኤረትራ