|
Friday, 25 October 2013 22:03 |
|
ዓስተር ዋስራዅማ እና ብሪል ኣከውሲ
ዓስተር ዋስራዅማ እና ባሓር ሃበውሲ
ሺራዅልድ ታኸትልድ ና ደርቢሲ ደኮውሲ
ንክማ አመሪ አተይና ዮ ሺዎውሲ
ንሂትልድ ደኵደኒ ዮ ከረፈውሲ
ብሪል ክስርድ ሻኸው ባሓሊ ክሰውሲ
ዓስተር ዋስራዅማ እና ባሓር እሰውሲ
ብራ ዳገኖሎም ባሓሊ ዓይብሰውሲ
ፈርደኒ ንሂትልድ ዮ ኒዲ ከብሰውሲ
እንደ ዋንሲ ኵገፍድ በቀቅግሪ ኵግርሲ።
ፈረኵ እንኵዅ ልኵኵ አዊል ገእየት አርእሊ
ብሪልማ ህምባዅን እማ ይኸ ባሓሊ
ዓስተርሊማ ህምባዅን እማ ብራ ዓንቀይ ጎቍሊ
ጋበለ ይአብልክ ኣና ገድም ተለየሊ
እንተውስክ ጋባ ኣን ቋለውሲ ድወሊ
ጉዳ ሽንክረስ የሉ ንደምቢ እንተርነሊ
ኵል ኣኽራስክ ፈርነሊ ቋልኑ ዋስኑ ክርነሊ
ጀረብረን እንቲ ላዅ ይን ህምብና ኣካንሊ።
ስርኒማ ህምበውድ እማ ስርኒን ደኮውድ
ይእሩጝ ድጙስቱዅ ስርያ ክረውድ
ስርነን ኪደለማ እና ይነዲ ህምበውድ
ፈርግኒ ዋንቱኑ ዓስተርድ ባሓርድ
እሩጝ ህምበኩለ እና ይዲ ህምበውድ
ንኪ ስርኒንሎም እንጫ ገንደለውድ
ኒግን እን ደበሳ ጃብራ ደኮ ህምበውድ።
ባሓራ ገብረግን ብራኻ ውርዅ ጉሽሮ
ግናይ እንጋዅ ቃዕረት ታሚታዅግማ ይሮ
ገንጅሩኻ ክተማ ናት ጃኸትልድ ፈስሮ
ክርደጛ ስሪርድ ፈርሓትልኻ ዋዓቢሮ
ገንጅሩ ክተማ ናት ኩጃብሊ ደኵስሮ።
ውራ ጋብነሊ ህምበውድ ክሪል ፈርግኒ ዋንቱኑ
ላምርነሊ አመሪ ኪደኵ ንኪ ዋሱኑ
ለሀክነሊ አመሪ ሺራዅ ፈርኖ ደብቱኑ
ስርኒንሎም ንኪ ጀረብደላ አመሪ ደብቱኑ
ቋልነኩን እንኵንማ ይነልድ ፈሩኑ
ና በልጛ ሀርከኩኑ ከብተዋ እንቋሩኑ
ክሪል ፈረው ተከኒ ናዕይኖ ገንደሉኑ
ውራ ጋብነሊ ንኪ እንቊቊ ዋሰው ክሙኑ
ክሪልድ እግሩ ሊጘር ክራ ከረፉኹለ
ደምቢራ ባራዅ ጃብራ ደኮ ዲኹለ
ይመኩል ተከኖ ባርነስክ ጉሽዅለ
ይት ካያ ጎለለክ ገንጃ ገብዅለ
ብሪዅ ኣቅትጊ ባሓር ዩዅግን ይዅለ
ዋኑ ክልማ አውኒ ገድም ከብተለ
ገውረታ ኣከላ እሸነማ ዋነለ
ዋነውድ ስርኒን እምንድክ ኣከን ደኵሮለ።
ህምበውድ ጋብኒን ክረው ክርኒ ይድኖ
እምን ጋብኒን ክኖ እርግኖ መንደርትኖ
እኵላ ዳድንን ጀረብናዅሊ ገእይኖ
ህምበውድ ስርኒን ኪዳ ክራ ዋስኖ
ብሪልድ ጉኖ ባሓርድ ዓሰስኖ
ጀረብነጛ ዓስተርድ ዓስተር ዋውኖ።
ሙሴ ዓዋተ
ስቶክሆልም
|
|
Last Updated on Friday, 25 October 2013 22:34 |
