blina.org. ብሊና

እና ንኪ ህምብነሪ ኤርትራ እን ሰካ 50 ኣመሪ ጃብ  ተምነትነሪት ተከላኽር ኣኽላኽር ይስተን ብን ኣኽላ፡ ውሪዅ እንዳኺቲን ይስተን እን ኣስባብ ገሪው ኣኽሮ ገረሰኵ፡ ገሪውልድ ደኮ ኮዶ ሺብሮ ድጞግረውር ኣኽራ። እን ሰካ ለመለም ብርፍ ዩ እንጉሲ እርጋ ተምነዲ ሸንሀትዲ ኒትክ እኵላ ብሳዅዲ ፈርሕዳዅዲ ቀሰንዳዅዲ መሀድኒል ሰገራዅ እርጉዅ ኒ መገለይ፡ ደኣም እን ኪሰሪትል የመምሳዅ ውጣን ኒ መገለይ ከተ  ሞዳይ ጣፍሕዲ ራግእዲ መሀድስሮ ገረስተጋ ደርብ አድነዲን ንኪ ትክስነ ጨገምትኖ ህምብነኵን።

ለመለም ወክትሊ ገቢለት ይናዅ ኒጉራብልድ ተርሰ ኒርሕድ ኒማልድ ኒትክ ኒናንተል ክመዅሲ  በቀቂጊ እንጅቢተውልድ ግን። ለመለም ዳለትሊ ገቢለት ይናዅ ገርካ ሕክም ኣምሓሪዅድ ቂራ ሕክም ጀብሀትዅድ ነበክል ቀቀርሶ፡ ኒ ሉኵ ላዃ ብሪል ኒሉኵ ላዃ ጎቊል ተካ መንብሮ ግን ኒደኵሱ እርጋዅ። እን ወረቢል ሰከር ወክትሊ ሻንሲ ዋኺስነዲ ላሕመት ወረቢዅሲ ዘረግኒ መታን፡ እንታቊርድ ማዕተብ እንሸዋ ፡ እንታቊርሲ ኩማንዲስሊ ዓስከሪሳ የው ንሽቅ መሪ ኣምሓሪዅድ ጀሀትድ ፈስቱ እርገው እክክም ላገፍድ፡ ጀብሀት ጀሀትድ ኮዶ ናዲ ናት ተከውዲ ኣስባብዲሲ ኣረሳ ብሊነስ አጃ ክሰገው ገሪው እርጉዅ። ደኣም እና ንስካ ሻንሲ ላት ክሰገው ናዳክሊ ናወረቢል ገሙሎም፡ ቂር ጀብሀት እንተረናጛ ካላ ስኒዅድ፡ገርግ ኣምሓር እንተረነጛ ፍንጢርዲ ወስዲሰ ከለብርዶ ስብድና ብሊና ወረቢል ኣርእስታዅ እርጉዅ። እና ጋሻይ ከለብርናድ አርእስታዅ ገቢለት ንኪ ኣኽራስክ ኒናንሰና ጎፍይጋዅሉ ኒኣክነድ ኒደምበራ ኪድኒ ይሮ ካያ ደኵራዅግን። ንኪ ዖነዲ በስግዲረዲ 43 ኣመሪ ጃብ ድድና ግርጋሩዅ ታና ጉድነኵን እንኵንዅን፡ ንኪ 43 ኣመሪ ደምቢ ውሪዅ፡ ውሪል እርግኖ፡ ኣውንኒ፡ ውራሃብነ፡ የው ወንቅርታት ስኵረን ናደርብል ህምበውግን። ደኣም እና ወንቀራታት ነን ንደምቢ እንተራዅድ ሊኳ ኣኽሮና ኣከገን እን 43 ኣምሪ ጃብ ጎስናዅ ላኸንሲ ተመድሮ ቀሪም ጀረብኒ መታን ካያ ኣኽጊ ሰካ ሓሰላዅልድ መሀርስኖ እንተራዅድ ይና ገሽ ጃብራ መኸልትኒል ከቢሮና ኣከን ትክያዅግን።

እማ ሰከታ ደለምግንግን ንክኻ ደለምኖማ ህምብናዅን ዩ እንጉሲ፡ ንኪ እና አወት ሀደግሱ ግጃዅሰና፡ ሰልፋ እንትጊ ዋኑ ደለምና፡ ደምብጛ እንቶሰና ኮዶ ናሺ ጎተጋዅ ሃብነ ስብድኖሉ ይማምዲ ለመለምዲ ጀረብዳዅግን። ሰከዲ ንኪዲ ሲረው ኣውካት ግን፡ ንኪ እንተራዅሲ ስዳዋዅድ ቅብሊስኖኽር ደለይድኖኽር ካባዅ መደትሊ ይና ዋንትነድ አመሪሲ ደለምኒል ካበውና ደርፍፍ ተላሕዮ ናዋንትነድ ሓሶሰሰይና ካያግን ጀረብዳዅ። እን ደበሳ ዖነዲ በስግዲረዲሩዅ ኮዶ ኒግን። እማ ጨበረንቲ ኣክኒልድ ጋጘንቲ፡ ኣቅሽወንቲ ኣክኒስጝ መንተለንቲ፡ ሕርጉምዲ ትርቊምዲ የንቲ ኣክኒስጝ መደረንቲ ኣኽኖ እና ወክት ንኪሩዅ ሀለል የኩና እንኵዅ። መደት ደኳዅሊ ሓለክስሮ ጀብሀትባ ሻዕብየትባ ያዅ ድግምሊ ሓባለክስና ይናገሽጃብራ ፈርግኒን ጨገምድሮና ገረሰኵ። ደኣም እን ድግም ጃበራ ይና ድግም ግን፡ ጋቢኖሉኽር ድዊኖሉኽር ይና ሓቅግን፡ እን ግናቲት ንኪሩውድ እን ጀብሀት ይስትረሪ 1961- 1981 ኣኽራስክ እርግረሪትል በላይና ኣካን በሀርኮት እርጉዅ፡ እን አሪ ገባይልዲ ኡክሊስሮ ቋልዱሉ ይና ኣካን እን ገባይል በሀሊንዲ እኵሊታዅ እርጉዅ። ደኣም እን እርገና ኣካንሲ ነፈዕስትንዅመሉኻ አሪ ወንቀራግን፡ እማ እና ሰከር ለመለም ወክትሊ እሲኖ ሒል ክምኑ እሲግነው እማ እሰግኒ ደኮውና ንክኽር እንዳኸ ደጒንና ሺሽድኖ ማኸልትንን።