blina.org. ብሊና

ከርተፍ ማእኮት ክርስትና ሻኸውድ ግርጋ በሀር ግን። ኒ ጉነዲ ኒ ፊነዲ ዪና ዓዋዲትል ንሰና ሰጘኵ።  ሪሒ፣ ኣዳምሩዲ ብሪውዲውድ ሲ ዓመቅርዶ ህንብረሪት ልጭሕድና ውሪ እንቓስና ግርጋ ጝን። ሪሒ ብንዲ፣ ማልዲ፣ ዕምጭዲሲ፣ ክርዶ ህንብረሪት እና ግርጋ ኒል ከርተፍ ስና ግርጋ ግን። ግብርድ ሸተክረሪ ግርጋ ግን። ኒ ኣኸውድኻ፣ ከርተፍ ዪና ዓዋዲትል በሀር ኣካን ሻኽቲ። እና ግርጋ ኒኒ ቱጝሪ ዋኺተውስኻ ኤረከነኵ፣ ዕሙጭንስኻ  ረሄይደነኵ፣፣ ሻዃኸውኻ እንግገውድ በነነኵ።  ሕጉላንድ ታውነዲ ነብርዲ ሕሩዲ ኤድርኖ ላዅክ ትብትጝድ ካበነኵ። ኔስኻ ብህሊንዲ ፈለደዲ ተከወነኩር ኣኽሮኽሮ ና ሙዅርሰና ቋለነኵር። ግርጋ ንሂትል ጋይተው ውሪ ምኻድውኻ ድገትል ወንተርድኖ ጨበርሰነዅ።

እና ግርጋ ኒሂትል ወንተርጋዅ ድዱኑዅ ማለት ግን እማ ና ከው ጀረቢድኖሎም ና ዋጅብሰን ቋለነኵ።  ግርጋ ኒል ናውክ ቆልዕ ድገሩ ሓዲስ ሰረና ሰረነኵ፣ እዅናኻ ሰርገይሰቲ፣ ድገኻ ሰላምዲ ሰርገልዲ ጃቢትሮ ላሕማ ሰደርዶ ድገትል ህንበው ጨገምስክ ቋልድኖ ክብርዲ  ሕሽምዲሲ ዲባ እሲነ መቕርሔነሪ ግራጋ ግን። ግናቲትኻ ኒ ግርግሊድ ብርፍ ዪኖ እስላማኽር ክስታናኽር ላገሽ ወረቢል ገምኖ ዋኺተውሲ ኤርኪነ ዋዓቡኑ ሓቀፈነኵ። እማና ንሰና ሰጘኵ። ንክኻ ውራ ህንባኹን መኸልትንን። ዪና ከውታትዲ ዪና ኮሊዲ ኒስ ብኖ ዋኒኒነዲን ንኪር ከርተፍትል ለመለም ኮድኖ ዪና ላሕመስ ነደቕኖ ጨበረኵና። እክባ ሙርቛ ብሊናኹ ክድመት እሰጝኒ ዪና ናንሲ ሕበረጝኒ ወረባ ደኵሮሉ ኣኽገት ኮሊኽር ሰላምዲ ፍትሕዲ ኤርቶ ኣኽረድ ቋልሳዅሉ ኣኸውድ ዪጝር ከርተፍ ዪንን።

ኪዳ በዓል ከርተፍ እሲን ተትር እሲን ዪነትር።

ፋርዕ እክባ ሙርቛ ብሊናዅ።