blina.org. ብሊና

ዳን ሞኮነን ተኽለ ጨራ ዲቢዅ፣ ሰንበር ሽጓዅ ግርጋ 10-01-2015 ትል፣ብሊና ወራና ፓል-ቶክሊ፣ ግርጋ 15.12. 2014 ትልድ ግርጋ 20. 12. 2014 ኣኽራሲክ እስተዅ፣ ዲባ ኮሊ ኤርትሪዅ ፋርዕ ልውታ መታን (ኤርትራዊ ሃገራዊ ባይቶ ንዲሞክርስያዊ ለውጢ) ሰረትሳዅ ቆብሎሩዅ ዲቢል፣ እክባ ፋሪዕ ብሊና ሙርቛስ /ሆደ/ ወከሎ ፈሮ እርጋዅ ድ ኣወያኽ እርጉዅን ያዅሊ እዳናዅድ በርህዱዅ።

እና ለመለም የንቱት ዕግሎ፣ ኣወያ ኣዋይንሊ መሄድስኹን? ኣዋኸ ኻ ንኪ ነት ጌእ ዮ ህንባኹን? ኤወየው ኣጭጉም ጎፍ ዩሉ እርጉኹን? ናንኻ ውሪ ግርብል ህንባኹን የውሲ ሻንድ ና ደምደምድ እዳናኹድ ገምዱዅ።

ኒ ብርፍልድ እና ዲባ ለመለም የንቱት ናት ናቱ ኣኽኖ ክድመት ደምዕደጋዅ ኣኸውድ ናውክ ላድ ኣኽሮ ከደምና ጀረቡኑሉ ሰጘነት፣ ኒል ጋእ ዪቶኻ ከው ፈሄመውዲ፣ ወክትዲ፣ ርድቅዲ፣ ጀረብደትሉ ከተግደናዅ ግን ዩዅ። እና ፈሀም ኒን ኒ በና ጋእ የሰና ኻ፣ ገንዳ ሙሩቑዲ፣ እክብ በሎቲኪውዲ፣ ሲቪክ እኩባንዲ፣ እንፋርዲ፣ ኣኽኖ ሰዃ ኤመሪ ጃብ ላድ ኣዋሲ ል ዲባ ተከልነድ ናውክ አርእናዅ ግን ዩዅ። ፈሪዕ እክባ ብሊናኹ /ሆደ/ ኒ ብርፍልድ እርገትር ለመለም የትር ተለይዱዅ። ኮዶ እና ዲባ ኒ ብርፍልድ ኣጭጉም እሰ ከደምገት፣ ለ ጛ ገንዲል ኣኽኖ ክድመትሲ ጃብስገዉሉ ኣኸውድ፣ ኒስ ቋላኹድ ኻ ተመምድረሪ ሽማግሌ (ፈጻሚት ሽማግሌ) ዲባ አሸሹራ ግርጋ 15.12. 2014 ሽጝሮ፣ 2/3 ዲባ ጨር ኣክብስንነዲን ዕግሎ እስቲሮ ገርሰዅ፣ ዩዅ። እክብሰው ዲባ ጨር ኣጭጉምሲ እንክኒል ናውክ ሕሽምድ ዲብትነት ሓበሩዅ።

ዲባ ጨር./ኣባላት/ ናውክ ና ምራድድ ና መድልድ ገምኖ ና አብልክ ሓዳይስ ሰዃ ሽማግሌ ፍሪርነትር፣ ወልታ ኤርባ ደንቢ ጉባኤ ሽጝስትሮ ድጙነትር፣ (እና ወልታ አርቢል ጨገም ወክቱኹ ውሪ አሪዅ ሓሰብስጋዅ ሕበርሰን ለጛ አርባ ኮስትሮልም ኣኸትር) ኮዶ ናውካ ኒስ ዓውቲስድኖ ቆል ቱነትር በርህዱዅ።

እና ሻማ ለመለም-የንቱቱዅ እዳናዅ ኣኽሮ ማለት ናትክ ሓቆፍሮ እና ጠፍሕድረሪ ሽማግሌ (ኣሰናዳዊት ሽማግሌ) ሕበርሲገውሲ ሕበራኹ ደርብ ቋልድኖኽር መድ እውስተትሎም በርህዱዅ።

ኒ ደብኻ አብሉራ ወረኒል (ባልቶክ) ኩነው፣ ሻን ሓይሳን ና ወንቐረስ ተለለይድኑ፣ ሓይስ ሞኮነንኻ በርህዱ ኵኑዅ። ኩሽራ ሳዓት ተመመሰናኻ ረኤዲ ፊነዲ ኮድንዅ። ና ረአይዲ ፊነዲ ሱኩሰው ሻን ናው ዩኑ ክነው እምንድክ ደበልደዊ ፈሀምደውዲ ለሓምደውዲ ቀስቀሰውዲ እርጉዅ።

ሓይስ ሞኮነን፣ ኮዶ ኮሊ ኤርትራዲ ንርከውዲ በዳን ህንብራኹልድ ፍቶ፣ ሻሎት ና ብሪል ሸንገልድኖኽር ዳበርድኖኽር ብሊን ዪና ናይ ኤርኖርኽር፣ እና ጉግ ንድ ኣኽኒ ኪድራ ዪናዅድ ኣኽኒ ሕሳንዲ እኺርኺር ሲ ሓሸምድነዲሲ እና ውጡጥ ህግደፍቲ ገፍትእኖ ኣመሪ ይስተጋዅ ክድመት ጨበረትና ፋነዩዅ። ኪዳ አመራ ለመለሙዅዲ ዓውተሩዅዲ ኣኽሮና ተምኔቶ ኻ ድጝዅ።

ልጝሲ ደፍእደዉ፣ (ኣድሚናት) ኒ ሰልፍልድ ከውሲ ባህ ሳዅ፣ ደርብድ፣ መርሕኑዅር፣ ደፍእዱኑዅር፣ ኽጝንነዲን፣ ሰላምዲ ሕሽምዲሲ ሽንክረስ ኤበድኑዅ። ኮዶ እና ልጝል ናትካ ልጝን ኣኻዅድ ናውክ ደፍእድንንሉ ዩኑዅር፣ ኪዳ ኤመራ ተምኔትኑዅር፣ ፣ ጋሻይሲ ዕንቦብድ ስብድኑዅር።

ፋሪዕ እክባ ሙርቛ ብሊኑዅ/ሆደ 13-1-2015