blina.org. ብሊና

ፍንሕንሕ ሆደ ሙርቛ ብሊኑዅ

ሸንሄት ሸናሕ ተሪትኒዅ (ሰላማዊ ሰልፊ) ቛላዅ።

ኢስያስ ናን ገሚ፣

ምልክ ፈረስኒ፣ ፍትሕ ነገስኒ፣

ጋይትነዲ ጅርበትዲ፣ ድኩናው፣

ሓይሳን ከውታት

ወክት ምልክ ፈረሳዅል ህንብነኩን። እና መድ ኒስ ተመምድኖ፣ ናይ ከውታታዅ ገድእሮ፣ ሸንሕ ተሪትኒዅ፣ ዓለምልክ ፈረኵ እንኵዅ።

ማልክ ኢስያስ፣ ቂጦሪልድ ገምጊን፣ ግንዲ ኮሊሩዅሲ ኣኽኒ ሃይማኖትሲ፣ ኣውራጀስ፣ ኣኽኒ ሙርቑሲ ኩቶ ይና ነብክል ቱዎ ፈተታሕ ሱና ዲዩዅ ንኪኻ እና ኩተና ኒኹ ለቦ፣ እን ኒድ ሰሀሩ ሰገውር ፈሀመነኩሉ እንኵኑዅ።

ኒ ማስ ሰጘው ሑሴን መባረክዲ፣ ማዓመር ቐዛፊዲ፣ ለብድኖ ሱኵርነሰና ኮሊዲ ኮልናርዲ፣ ጀበረዲ ላሕመዲት፣ ጉዲነክ ጎሊቱኑ ቛልኑዅን። ና ከውታትኻ ኣና ማልካን ግብርሲ ትክሲነ ፈህምንነዲን ዋሳዅ እንቁዋ አርኒ። ና ለብነስኻ ቋልነኩን እንኵንዅን። ኢሳያስ ር ኢቶቢያ ኣኽርን ኣሜሪካ ወረርድኖና ደበልተነኵ ዮ ዋዕ የኵ፣ ኒንኻ ኒ ለቢ ግርጋ ተመምነዲን ግን።

ና ጠብዪዕድ ማልከን ፋሺሽቲ ኮሊት ኣኽኒ ጀበረቲዲት ግንዲ ኣኽኒ ከውታትሲ ሕስር ሻኽኒ። ናት ሻቐልዳዅ አዋሃቢነ ሲመርሊ ኮፍ ዪኒን፣ ናው ፈረነጝር ናቁርሲ ውሪ ና እኵንሲ ናዕስድኖ ለመለም የነኵ። ኒን ኣኸውድ ዳልየት መልክ ኢስያስ ሩዅል ክረውዲ ጋይተውዲ ትግር ክረውዲ ንጃብ ዪና ኮሊትል ቋልሶ አርላ።

ኮዶ ማልከን ሻሎትዲ ዕልዲ ቁሸዲ ግን። ሻሎትሲ ኣንከለኒ። ውሪዅ ይደነንኻ ሻሎት ምልክ እንከለላ። ማልከንሲ ናዕምርሲ ድርጝደው ሻሎት ግን። ንድኻ ማልከን  ሻሎትሲ ዲሂስድኖ ዲምክ ቂርዲ ገርክዲ ለመለም የነኵ። መልክ ኢስያስር ኔስ ግን ንእሳዅ። ሻሎትሲ፣ ሓርብል ቱሶ ዲሱዅሎም፣ ክኻትግኒኽር ከደምጝኒኽር ጋቕል መንደርደኵሎም። ብረስ ባርኖ ጋትድኖኻ  ኒ እሲጋዅ ውንጄል ከብተዅሉ እላ። ኒንኻ እና ቋልናዅ ኣኻዅድ ብን ግን ያዅ እላ።

እማ ሓይስ ሻሎት መልክ ኢስያስ ኩት ዲሂስሮ ሰሀረት ኣርኢ። ኩ ክልል ፍዲትኖ ላውድነሪካ ኮሊት ቋሊ፣ ኒኒ ድገ ሰኸረዲ፣ ሸብዲ፣ ለጛ ሽቕሪ፣ ሰዃ ሃዊሪ፣ ድገ ዓዊዲድ ፍትሕዲትሪ፣ ግን። ኩ ሸንሃትሲ ንርትል ካያ ግን ኩ አረርና እማ ለመለም ዪቶላ ኩ ዋጅብ ግን። ሓጋለትድ ጋትግረድ ትክስረ ፈሀሚ።

ቓብሎታት እና ሻሎት ና ኮሊትልድ ብርድ ፈረነን፣ አውኒ እመሪ ፍዳታት ፊነስ ሙኹራዅ። እማ ዪና ንበክል ህንባዅ ሻኑዅ ዋኸዲ አባይ ዋኸዲት ሕበብርግኒ ና ደር ደርብ ሻከነሎም ህንበኩና፣ ኒል ደኮ ሕበበርነሎምኻ ወንጄል ከደምነት ፈሀምኖ ህንበኵና።

ሓይሳን ከውታት፣ ንክኽር ኩ እማኒሰና ከበሰዲ በረኸዲ፣ ክስታንዲ እስላምዲ፣ ናውክ ሙሩቑ፣ ከርተፍ ዪንን። ፍትሕ ናን ዪንን። ዲመሲ ሰላምድር ፍትሕትድር መንደርትኖ ኮዶ ሙርቛ ለመለምስ ካብኒን፣ ኒል ደበልትንን፣ ኮዶ ላሪ ኩ ናይልድ ሸረፍስሮካ ትም ዪጝ።

ማልክዲ፣ ሸንሓዲ ባርነዲ እላ፣

ማልክ፣ ናን ከውታቱዅ አርኒ

ፍንሕንሕ ሆደ ሙርቛ ብሊኑዅ አረትራ

ለንካ ምህሮዲ ከበርዲ  March 25, 2011