| ለጘረጝን ኣመራ ጀበረት(ናጽንት) ኤርትራ |
 |
 |
 |
| Written by Administrator | |||
| Tuesday, 24 May 2011 08:37 | |||
|
ለጘረጝን ኣመራ ጀበረት(ናጽንት) ኤርትራ እና ሕክም ኒን ኣዳሚንድኹረድር ጀረብደዉልድ ላሪ ዓማርዲ ሕሽምዲ ዲሞቅራጥየትዲ ምሩቅ ናይዩዲት ዓዉቲስሮና ቀደርላ። ይናምራድ ሰና ይናረኤይሲ ይኖ፣ ከተብኖ፣ ይን ጀርብነዅልክ ፈርኖ፣ኣንኩልኩልስኖ ኣኽን ፋይሕል ፍኖ ሰላማዊ ሰልፊ ፈቀደጋዅ ሜሪ ግን ይነበለድል ሓከሞ ህንባዅ፡፤ድርጝ ያኽድ እና ኣርሶ ህንባዅ ሰርገል ብረድ ካያ ግራ ንርሻዓብድ ኣኽላ። ኒን ኣኽሮ ንቀደራዅ ዋድሕዲ እሙርዲ ግን እቚቱ ከው ኢሰያስዲ ኒጨርዲ ናሹር ክብርዲ ርድቅዲር መታን ሸዓብሪ መንፊዒትሲ ጃቢስድኖ ቀደርኒ። ኤረሳ ጎደ ኒ`ጃኸሪልድ ኒሹሺ ኣኾ ኤሪውድ ኣኩ ሰጛዅ እንከልጊ ድጙስተጋዅ ዕስክርነትሊ ትዎ ከብቲዅ፡ ኒብረስ’ኻ ብራ መሪሩዅ ግን ይስቶ ሒልድ መንተልሰኵ፡ ኒቖልዕዲ ኒእዂነዲ ኒዋልደንድኻ ኒ’ደንቢ ናድጌትል ከብቲነ ድብርድ ክረነኵ። ሸቃለዲ ምሁራንዲር መናብረት’ኽር ንስን ኪደላ፡ ኣረሰዲ ሸቃሎዲ ፍንሕኒሕ የግነን ኮዶ በለድ ዳበርዶ ቀደረላ፣፣ እነ ደክው ለጘረጝን ኣመራ ጀበረቱ ገንሽናርዲ ዓጨበዲር ንኻ ላሪ ደባርዲ ዓማርዲ ቛልስትላ፣፣ ንኪር ሻሎት ኣርኖ ህንበነሪ መምብሮ ናትክልድ ትብተጋዅ ኣኽነዲን ነት ደገምሳዅ ኣኽላ። እነ ለጘረጝን ኣመራ ደከውሊ ሲመር ቤሪሩዅሲ ሻኽኖ ይነበለድሲ ንሽዋ በሄርሊ ናቀየርና ኣመትኣለበድ እስቴዅ ኣኽላ። እነ ነወየ ወልወለዓት ዓንቀይሊ ዋንትኑ ግን ይን ንኪ ለጘረጝን ኣመራ ጀበረቲር ግርጋ ከበርድናኽ። ንኪ እና ለጘረጝን ጀበረቲር ኣመራ ከበርድኑ ይናነቢርሊ ውራ ቀየርስኹን ያኹ ወንቐራ ኣኽጊ፡ እና ሐርቡኽዲ እንሸውስኒኹዲ ከደን ጋይትነዲር ወክት ኣዉን ኒደኣም ኣኽሮግን ያዅ ኣኽሮ ሻኵ። ኒን ይነጅወድ ኣኾ ከደንድ ኮዶ ይነ ኣግዋርዲ ድወልዲ ሸዓብዲ ንክማ ጠዓንብረና ኣመሪ ይኖ ኣልኮተተነሪ ኤርትርያ ኣባይ ኣኽሮ ህንበቲ። እነ ጂባ ኒልድ ፍኖ ውራ እስኒን ያኽ ወንቀራስ ለመለም ደርብ ካያ ግን ኒት ዋንስሮ ቀደራዅ፡ ንኪ ይነሻዓብድ ገሪው ሳዳ እወው ክድመት’ኽር ከደምሶ ህንበኵ፣ ሽዓብ እርትርይው ናምሩቕዲ እነ ኣባይሲ ናዳግልድ ያዕ ይድኖ ድጝኖ ከምከምስኖ ጝኞ ህንበነኵ። ሻሎት ናው ህንበናኹልክ ህግድፍ ናኣባይ ኒኣክነስ ኣለለይኖ ኒኣንጻር ደበልትኖ ጝኞ ህንበንኵ። እነ ነጚር ጥቅምቲ እስቲሮ ፈራኽ ሻነ ዲባ ፍትሕ ዓውቲቶ ፍሮ እስተው ክድመት ይን’ኽር ይነ’ናንሲ ሕበሪኖ ወክት ሽጛኩና። ስሔ አፍሪቃዲ ቕብላ ነበካዲትል (ማእከላይ ምስራቅ) ህንበው ይነሻን ናናይ መታን ለመለምልድ ገሪው መሄርስኖ ገረስነኩን። ሆደ ምርቛ ብሊን እነ ለጘረጝን ኣመራ ጀበረቱ ከበርድኑ በላይንዲ ሸዓብ ኤርትርይውዲ ኣጂ በዓል ኣኽሮኖ ተምነትኑ እነ አባይ ይነዳግሊ ኒሒልድ ክርከሮ ህንባዄልድ እንተዲ ኣኾ ያዕ ሲኖሉ፡ እን ጂባ ይነዳግሊ ገእስውሲ ፍርድ ጃብል ስክርድኖ ይነሻዓብ ኒሐቅ አርዳሲክ ከደምኖ ክም ኣክነድ ማእኮት ትዉነኩን። ኪዳ አመራ ጀበረቱ እምን ናይርሊ (ሓርነት) ጋእሳዅ እሲን ዪነት፣ ዪና ፋዳታት ና ፊና ሰርገልዶ ሆደ ሙርቛ ብሊን 22.05.2011
reviewed by N.
|
|||
| Last Updated on Friday, 10 June 2011 12:23 |
mod_btslideshow
Saturday 19/12/2020 Live stream on 20:30 Berlin time.
