| ይነ ፍዳ ደኮው እልብድነሪ ግርጋ |
 |
 |
 |
| Written by Administrator | |||
| Tuesday, 21 June 2011 20:34 | |||
|
ይነ ፍዳ ደኮው እልብድነሪ ግርጋ ላ`ኣርባትል ኤርትርይል ናቱር ድግም ሻው ታሪኽ ይናኹሊ ዲመሲ እልብርሱ ቀለም ዋድሕድ ከተብሰዉ ግርጋት ህንበኵ። ናበልጝ ዓውተዲ ዕላላትዲ ፍርሐትዲር ግርጋት ኣኾ ኣለለይሰው አኩ ኤሪዉ ኮዶ ይና መታን ፍዲተዉ ይና ሻን ሓይሳንሲ እልብድና ግርጋ ግን። መስከረም ላዅ 1961 መንዱቕ ምኹርኖ ይነ ኣባይሲ ዳገኖ ከምከምስኖ ብርፍ ይነሪ ግርጋ ንርኣክነድ፡ግንቦት 24 1991 ኮዶ ይነ ኮሊ ሰልፊ ምዕራፍ ይነለመለምኽ ይነ ዓውተሲ ድግስተኽ ናኣክነድ ፍሉይድ እልብርሰውዲ ክብር ታሪኽሊ ክሰሪዲ ፈርሐትዲሲ እልብርሱ መንደረተው ግርጋት ግን።ኒኣንጻርድ ኮዶ ኣስካሕክዳኽ ግብር እስተውሎም ይነ ኮሊት ስጅንሊ ቀየራኽ፡ ሸዓብሲኻ ናናይሲ መንተሎ ላውዲ ሸንገብዲሲ ኣፍይቲ መሄዶኖ ናጨር ሐርብሊ ቶኖ ክርድኖ ኣዋጃትዲ ትእዛዛትዲ ፈውሎም ግርጋት ናኣክነድ ጂባዲ ደማርዲ ክረዲ ሐሩቀትዲር ግርጋት ኣኾ ኤለለይሶው ግርጋት ኮዶ ህንቦክ። ሕኩመተ ህግደፍ’ኹ ሸዓብዲ ዓስከርዲር ኣማነትሲ ጠለምኖ፡ድንጋሕድ ኣዳምር-ኣባይ ኣኻዅ ሕክም ተከልነድ፡ ዲማ ግብር በዳን እስኒልድ ግጥግጥ ይግኒ ይነ ኮሊት ወልወል-ላዓልሊ ሲኦል ለወትንኹላ።ላገፍድኻ “መዓልቲ ሰማእታት” ይነ ፍዳ ደከውድ ግርጋ 20 ሰነ’ት ከበርድኖ ይኖ ኣትሃመልዲሰና አኽሮሎም ሸዓብዲ ሕበርሲነ ወሸቓ ገምደነኵ። ድምኖ ኮዶ ኤርትርይል ምርቑ ይስተው እልኒ ህንበው ናትናቱር ጋብ ሻው ቆም ካይ ግን ይኑኽ። እነ ግርጋ 20 ሰኔ ውድብ ህዝባዊ ግንባር፡ 19 ስኔ 1991 ፍድናኽ መግለጺትል፡ እነ 20 ሰኔ ገሪው ሰማእታት ከፈልነሪ ግርጋ ንርኣከነድ ከበርስቶኽር እልብርስሩ መንደርትቶ ወሰንኹን ይኑኽ።እነ ግርጋ ኒህቲ ይነ ኣባይ ህንበውሉ ደሽዲ ታንኪታትዲ ጣይራዲ ኤዶ እን እንሲን እርገው ይነሻን ህዝባዊ ሰራዊት ላዶንዲ ዲመዲሲ ዲኢስሮ ከምከምሶ እንተሪ ግርጋ ኣኽሮ ናውክ ሐጠርድ ደበልትኖ ኣረኻ በሄር(ክቡር ዋጋ) ናርሕሲ ይነ ፍድ ደኵስነሪ ግርጋ ንርአክነድ ሕሽምድ እልብድነሪ ግርጋ ግን።እና ግርጋ 20 ሰኔ ከበርድና ኣኽላ እንጨገም።እና ግርጋ ኒህቲ ከበርድኑኽር እልብርድኑኽር አወየ ሃደፍልድ ጉኖ ኣብዓልድናኹንሉ ቛልስትሮ ጀረብዳኹ ግን።ኣዳሚንድኽራ ኒ’ሐያትሊ ኒ’ፊኹትስን ክጝዋዅሉ ነገር ኣላ። ይነሻን ይነ ፍዳ ደኵዉ ናሸንሄት እርጋዅ ይን ሕርየትዲ ናይርዲ ኣርኖር መታን ግን። እነ ንኪር ግርገስ ናስጙድ በዓልድኑ ናሸንሄት እርጋኽ ኣክል-ሕድማ ግብርሊ እርጉኽን ይኖ ይነፊኽትሲ ወንቀርኖ ተገብኤኩና።ናው ና’ዋጅብሲ እሲነ ደኵኑኽ ይን’ኻ ይነ ወረባ ሰላም ወንተርዶሉ ውራ እሲኖ ሻኽንኹን ያዅ ወንቀረስ ዋንስኖ ተገብኤኩና። እነ ኣመራ 2011 ካያ ቛልነን ሻሎትዲ በህሊንዲ ናብረስ ባርኖ ጋይቱኑ ሱዳን፣ኢትዮጰያ፣ጅቡቲ፣ምስር፣እስራኤል፣ሊብያ ይኖ ኣውሮጳ ዓይብርድኖ ይኑ ፈሪኑ መግደረውዲ ናው ሐሰብናኽሊ ገእ ይግኒ ነብነበክል ዋንቱኑ ሐርብ ተለዮሎም ውሪል ዋኒነት ኤርእስትግውዲ፡ኒዳግሊ ኮዶ ኣዳሚንድኹራ ጨገምዲ ርሕዲ ጎሄይደጋኽሎም ደላሎ ናንትተል ገምኖ ጂባ እዲኒኹሲ ቛሎው ገሪው ግን።ናትክስጝ ጂባዅ ኮዶ ጅምለትድ 425 ይነሻን ናርሕሲ ባሕር ነበኪል ላዶንሊ ብኑኽ።ዓለምልክ መንደርቶው ኤርትርይን ላት ኣኽኖ ገሞሎም ህንባኽ ጨገም ሰበትድ እኺርኺር ደፍኣት እዉኑዅ። እነ ኤርትርይል ህንባዅ ሕክም ነድ ቛላኹድ መኮረት ድኳ ፍድላ።ነስኮ ይነሻን ባሐርሊ ክርኖ ዋኑኑ ኤርትርይል ልጝን ሺባ ወሸቃ ገሙ ኒደሄይ ዋስስትጋዅ ኣስቖቦ ትም ኒይና ኒሐቅል ግን ውረድ እንሰበብ ና’ጋይትኒኹዲ ናክረዲ ኣመሪ ይነወረቢል ፍትሕ ተከልሶሰና ወንቀርስድኖ ግን።በጋ እነ 20 ሰነ’ት ናድ ናላሪ ኣኽለሎም መላኪን ሸብዓሲ ምሊድኖር መታን ይነጂቢል ጎሃዮዉሰና ኣኽኖ ስኩረነኵ። ሆደ ምርቛ ብሊን እነ ንኪር ግርገት ሸዓብ ኤረትርይውዲ አኾ ይና ፍዳ ደኵዉሲ መንግስተ-ሰማይ አዋረስድንተት ይነኩን፡ይን ኮዶ ናፈለኻስ ተለይኖ ይነወረቢል ሰላምዲ ፍትሕዲ እኩልናርዲ ዲሞክራሲዲ አርኖ ለመለም ይኖ ይናአክነስ ድሞኖ ማእኵት ትዉነኩን። ሆደ ሙርቛ ብሊን 19.06.2011
|
mod_btslideshow
Saturday 19/12/2020 Live stream on 20:30 Berlin time.
