blina.org. ብሊና

ሰልፍ ስለፍኬር ሰላምዲ ዓፍየዲ ሕርየዲ ተምኔትነኩንልኩም። ንኪር ክቱብሊ ሰዃ ሽንክራ ወክቱ ህንበውል ዪና ረኤይ ኡኖ ግን ኮዶ ሰጀር ሙርቛ ብሊኑኹ ኒ ዋንትነስ ተብድሮኽር ጃብስሮኽር ሰርገልድሮኽር ዲባ ናትክ ሓየባኹ ናን ትልድ ተከልስሮ ፋሪዕ እክባ ሙርቛ ብሊኒኹድ /ሆደ/፣ ኒ ታዕዪብሲ ጃብስሮ ግን።

1. ዕማም ፎርቶሩዅድ ቋላኹድ፣

ጃቢቶ ኣኽን ደንቢቶ ሽዓብ እስታትሲ ዓውቲስድኖ ዕማም ፎርቶሩኹል ኣኽኒ ሆደትል ለበው ዪና ፋርሳን ፍዳታት ዲምክ ዪና ለበኪል መንደርትናው። ኩሱስንኻ ስዒድ ዓሊ ሕጃይር (ወዲ ዓሊ) ክራ ግናደት ኣኾ ከብተጝን እኒ ቲኹሳዃሲ ሻኽኖ እርግናኹ ኒ ኤመሪኹ ቲዃ ዪና ድብላስ ሸጥ ስናኹ ታና (ዝክር) ግን። ሻን ሓይሳን ኩመታን ክርና ኣኽጚ እንሸቅሮሉ ሺሸንካኽር ሻቐልስርኵ። ስዒድ ዓሊኹራ ኒ ሽጉልድ እና ኮሊሲ ሓቆቆያኹዲ ክራ ነበክል በረጃኹዲ ፍርስ እርጉኽ። ጀበረት ደንቢ ኮሊ ሰላምዲ ፍትሕዲሲ ገመልቶ ሳዳ እርጉኹሉኽር እርጉኹናኽር። ጣልሜን ጠለምንነዲንኻ ዓሊኹራ ኒጨርዲ ኒ ታንክዲ ኣስመራ ፎርቶትል ዓረጎ ዪን ሰሀርነውሲ ደንጋሕድ ድዊኹሎም። እና ትክ ኮሊሩኹ ተምኔተዋ ዓሳክር ፋሺስታ እሳያስርውድ ፍትሕ እንገት ጥይትረድ ደብደብስኑኹ። እና ፋርሳን መሀርስኖ እድሲ ብኖልና ህንበነኩ። ኣኾ ደርብድ ለመለም ዪንን ዪናኽርዲ፣ ሰላምድ ለመለም ዪንን ዪናኽርዲት፣ ለጛ ደርፍፍ ሻኽኖ እኺርኺሊ ሓራቐምናኽርድ ድራር መቕዳጝናኹ መጠይኑኹና። ሲርጝኒ ናውክ እና ድራርድ ፍርሕንኹን ኮዶ ሳዳ ኮዱኹና። እኽርኺርሲ ሕሽምድ ቋልነን ስዒድ ዓሊኹራኻ መስቀል ሻኾ ፎርቶትል ፍላ። ታንኪ መርሔ ግን ፎርቶ ኒ ዓርጋኽ። እን እማኒውሰናኻ ፍትሕ እንገድ ጥይትረድ ኩኑኹሉ። ኒልድ ጉኖ ለመለም የንቱታት ሲድውልድና እክበውና በጃኸት ትክስነ ቋልኖ ዋነትና ደርብ ብዶልና ህንበኩ። ፋሺስታ ኤዊል ዋንትነድ ኤርእሮ ጀረባጋኹድ ቅብሊ ኣኽሮ ሰላምድ ካያ ዪና ኩሹቲ ምልነጝን። ግብርልኻ ቋልነሰና ዓሊኹሪሰና ጂዊልድ ማ ከደንልድ ማ ዲምክ እኳርስሮ ኣኸት ሸክ እላ። ኮዶ ዪና ዋንትነስ ተብድኖ፣ ኣጭጉም ዪነውሲ ለሓምኖ እንክኖ፣ ነበካ ኮሊሩኹ ዲባ ቃብሎሩኽ ጀርብደኩና። ኒን ዋነገን ይንኽር ዋኒኖ ኣኽጝነት ደኮው ኤመታተል ቋልናኹ ግን። እማ ኮሊት ኣኽን ዪና ከውታትሲኽር ተክለብኖ ሲደውሲና ገለልኖ ዲባ ነበካ ዓመርድንን። ዪጝር ዪና ናይሲ ዕዳጊል ገምድጝኒ ለመለም ዩነኩን እንኩንኹን። ጪፋ ብሊን ሙርቛ ኒስ ፊና ጀረብደለና። እና ፋሺስታ ኢሳይስ ኒ ዕምር ድርጝሮ ሊብኒትነድ ላኹክ ኒ ዓቕምስ ኣሲሮ እና ግርጋ ሽጘቲና።

2. መሪ እስራኤልዱኹ፣ ናይ ጋይተውዱ ሓረምኒኹድ ቋላኹድ፣

እና ጨገም ኒስ ናዕሳኹዲ እዃራኹዲ ዪና ኮል ህንባዅ ሰርጥ ፋሺስታ ኢሳይስሩኹ ኣኸት ሸክ እላ። ፋሺስታ ኢሳይስ ጋይትነን ሰላምድ መንደርታኹ ተከሉ ከውሲ ጋይድሮ ገንጂ ካኩ እንኩኹ። ኮል ዋንትነን ከደን ፍነን ዪና ናይሲ ሚኺረጝነት እስራኤሊ ህንበው ፋርሳን ሻን በሀር ምህሮ ግን። ሆደሩኹ ግርብሲ ና ለመለምድ ክብ ሰነት እሙር ግን። ፋሺስታ ኢሳይስ ገንጆ ክሮ ኣኽላ። ኮዶ ጃቢቶ ፈው ኣኽንን ናን ደንቢረድ ጋይትኖ ህንብናኽር ርኤይ ጫርይ ዪና ኣባይሊ ነቀሰኩና። እና ጨገምሲ ፖሎቲካ ደርብ ፈሀምጝኒ ኒኪር ቂር "ዪድ ታሚትንለ ግራ ኤሪው ረመጭል መንደርትናው" ያኹ በዳንዲ ሓዋንዲ ፈሀም ዓብለሎ ዋነት ናውክ ቋልናኹ ግን። ኮሊትልድ ጋይትና ኒድክልድኻ ብሊና ዓዋዲትል ክረውዲ ሺቢሳዅ በዳን ሓለገት ግን። ኒልድ ጂባዅ ጋይትሮሰና፣ ወረቐት ሻኽረሰና "ኣን ቅጫራ መታን ጋይታኽር ግን" ውሪ ይት "ውራ ቱሶለ ውራ ስቁብ ዮ ይአብ ሻኾ ይቅጨራ ቋለሊ" የነዲ ሓዋናና ጋብ ግን። ርድቕ ኤርትርይል ህንቦክማ እላ ይኖ ጋቢኖ ናን ወክት ሻኽኒ። ደሀብ ደንክስትኻ ናውክ ዋስናኹ ግን። እነ ደኮው 22 ኣሜታትሲ ኤርትረት ሓግሊ ኣኽቶ እሴኹ ህ.ግ.ደ.ፍር መሪ ስያሰት ግን። ዪን ሓገልነንኽር ፈሀም ሓግልዲ ጭጉምዲ ሕኩመት መሪት ሻኾ ዋኒነዲን ግን። እሳራኤሊ ህንበው "ይን ቅጨራ ማታን ጋይትኒ፣ ፖሎቲኪ ሰበትድ ጋይትናኽር ግን ዪና ናኹ ደሄብ ሽንክራ ሰርገይስናው ይነኩን ። ዕምጭድ ጋይቶ "ይት ውራ ቱሶለ ያኹ" ዩ እርጎ ሰልፍድ ጎትሳኽ ዋነን ኒ ካያ ግን። እና ነወያኹ ረዳእ ሻኹ ፖሎቲካ ኣውናርዲ ርኤይዲ እንጋኹ ቛላ ፖሎቲኪኹድ ጭጉም ዪስተኩ። ኔን ማርሓናኹ ማሕበርዲ ደርብዲኻ ድዲል ካይ መርሓኹ ጨድፍ ግን። መንብሮ ጋይትኒኹል ዋንትሩ ኩቱ እስተው እላ። ናውክ ላሕመዲ ሕሽምዲሲ ኩ ጨገምሲ እንክቶ ለመለም ዪቶ ዋጅብ ግን። ውራ እሰናኹን ውራ ጋበናኹን ዪረክ ለመለምየንቱትት እርጝግኒ ውራ እስኒንን ውራ ጋብንኒን ዪኖ ተሰሃለኩ። እና ታዊነስ ጨረድኖ ካያ ፈርንን የው ኔን ሕክም ህ.ግ.ደ.ፉኹድር ርሕ ኡዱኖሉ ፉፍ የውር ግን። እና ንክር ወክትል 360 ዪና ከውታት ላ ወክት ባሓርሊ ክሩኑ ነበክል ደው ዪና ኣምርዲ ፋርስዲ ሓይስዲ እሰላ፣ ጂባኽ ህግደፍሪ ጨራ ዋንትረድ ቋሊሳኽ ግን። እና ድብለስ እንከው ስማርጝኒ ህግደፍር መክተብል ወንተተረነኵ፡ ና በዓላተል ወዳይ ሰናይ ኣከነኵ፡ ህግደፍ ወንቐረውስክ እሰነኵ። ኔንኻ ና ርሕዲ ጋይተውዲት ዕዳጊል ገምድኖ ዋኒነት ሰቆርሰኩሎም እላ። ና ሻን ርሕድ ዋዓበው ዳልመን ግን። ኣና ናን ወክትል እስራኤሊ ድገምሳኹ ሓረምስና ጋይተውዱኹ ኒልድ ጎኽ ጨገም ጝን። ወዓብ ህግደፉኹልድ ደጎግሳ የንኩን። ኒ በሀርድኻ ፋሪዕ እክባ ሙርቛ ብሊኒኹድ /ሆደ/፣ ኣና እስራኤሊ ህንባኹ ሃወድ ኣቅትራሲክ ሰሀረኵ። መርከብ ጣሓልዱ ርሕ ደኤንድና ግን። እስራኤሊ ዋኒግናኽር ቀደርናኹስ እሲኖ ዪና ሙዅር ግን። እንግሊዝድ እያምል ዪሳቕ ሻሚር (Yitzhak Shamir Prime minister ) ከረንሊ ሓየርሶ ሰጘት ኒ፣ ኒ ላውድ ጋበዅ ግን። ኒት ኤልብዱኻ፣ ኒሰና ወክት ትክያዅ ቋሊ፣ ክስታንዲ እስላምዲ ሰላምዲ ሕሽምዲሲ መንደርተናዅ በለድ ዮ መስከራኹ ግን። ንኪ ዪሳቕ ሻሚር ዋነን ኤርትሪው ና ብሪል ዓጨባ ርዱቕኹድ ጋይትጝነት መስከርድድ። እስራኤል ጋይተውዱ ፍትሕ ገብና ንርድግምሊ ታሚታኽ ኣኽላ። ምጨት ኒስ ሚኽርኖሉ ኣኽኒ። ኮዶ ኮላት(ድወል) ና በልድ እድሲ ብደነን ውሪ ኤበደነን ናት ልኽኑ መንደርትኖ ታሚሰላ። ዪን ውራ ኣስናኹን ኤርእኖኽር ፈሀምኖኽር ሓሳንድ ሕጊ በለዲርኹድ መንደርትኖኽር ወንተተርኖኽር ክምነት ዪና ጫገምስኻ ኒ ስርልድ እንክኖ ለመለምሊ ደበልትኖ ወጨም እስነ ህንብናኹማ። ፋሪዕ እክባ ሙርቛ ብሊኒኹ /ሆደ/፣ እና ጨገም ኒን ጃቢቶ ውሪ ደንቢቶ እንተረድ ቋልኑ እንትናዅ ግን። ወሸቓ ኣኽሮና ኻ ፋሪዕ እክባ ሙርቛ ብሊኒኹ /ሆደ/፣ ከደን ህንበው ዲ ቃብሎታታ ዲባ(ኤርትራዊ ሃገራዊ ባይቶ ንዲሞክራስያዊ ለውጢ)ተከልስሮ ለመለም ይንኹን። ንሰና ወንቐራ ላ እክበድ እንክሳዅ ጨገም ኣኽገት እምነኩን። ቃብሎታት ዲባኻ(ኤ.ዲ.ባ.ንዲ.ለ) ኒ ጨገምስኽር እንክሮ ቀደሮ እላ። ንደንብኽር ለመለም ጀረብደኩሉ። ፋርሳን እስራኤልትል መንደርተው ላኹክ ኒ ደርብሲ ቋልጊ ላሕመትድ ና ርሕሲ ኣኽን ና ዕያልሲ ኮፍሲረሪ ኮሊ ኤርድኖ ለመለም ዪድኖ ፋነይነኩን። ፋሪዕ እክባ ሙርቛ ብሊኒኹ /ሆደ/፣ አክታም እክቦ መሪ ዓለሙሉ ፈርደክ ካበሎም ዪናዲ ሰላማዊ ስልፊ እስነዲትል እንተ መጡ ደበልቶ ደው ዮ ህንቦክ። ኮዶ ኤሪ ደርብ ህንበኩ ያኹና ዋነጝር ድዊሮና ይጛ ለመለም ዪኖሉ ከለብረንቲ ግን።

3. ጉንን ደበልትን የውድ ቛላኹድ፣

ወክት ኒል ጉንን ደበልትንን የው ሓዳይስ ከውታትር እክብር ፈልፈሉ ቋልነኩን እንኩንዅን። መርሓባ ጉነዲ ደበልትነዲ። ኮዶ እና ጉነዲ ደበልትነዲ ደከውዲ ህንበውዲ ንደንቢ ኣኽሮ ሻኸው ፍትሕዲት ወንተሶማ ወላ ዓቕልሲ ጨበብዶ ጉንን ደበልትን ናው የናዅ ቋልኖኽር ወንቕርኖሎምኽር ዪና ናይ ግን። ዪን ንኪ ጉኒ እና ናን ጉንን የውና ናው ወንተርኖ ፈተሸነን ብሊና ሙርቑሰና ኤውን ጉነት አርእድኖ ቀደረነኵ። ጉነዲ ደበልትነዲ ገባይል ኤሪትሪኹ ንኪ ፉፍ ዪሮ ትልጭ ስራኽ ላኻ ውሪ ለመለም ኣኽላ። ዲዩኹ ህንበዅ ዋኒሮኽር ግን። ነቀሶ ህንባዅ፣ "እኺርኺር ክብርሲ ተከዋዅ ፍትሕድ ነበካ መቕርሕ ብኖ" ህንብነኩን። ገንጂኒልድ ጎረክ ኮሎንቡሩ ጣዕብና ካያ ኣኽጚ ናትክ ኣካኹ ደረብ ፍትሕድ ጀረብሲሮ ህንበኩሉ። ዓደጚነክ ና ሹር ክብርድ ጋበው ኣከነንኻ ና ጃብር ገሪው ቋልሰው ዋኒነዲን ኒጝር ኒ ግርገስ ኤዶሰና ደኩሮ ግን። እምንድክ ገንጂልድ ጉኖ ዋነነን ናይ ሙሩቑ ኤርትሪውሲ ና ፍትሕ /self determination/ እምንድኖ ሻኽኑዅ። ኮዶ ኤርትሪ ሕኩመትሲ ሒል ሻኻዅ ባሓትሮሉ ኣኽጚ ነበካ ልፍናርድ /federalism/ መሪ ተከልስሮ ናንትልድ እምንድኖ ህንበኩሎም። ህግደፍቲ ሰልፍድ ጨደፍድንን ኣስመራ ገእ ዪነሰና ውራ ጅንስ ሕክም ተከልስራ ቛልነሉ ዪናኻ ጉግ እምኑኹልድ ፍና ግን። እና ጉግ ኒን ይነድ ነፍዓዅ ካይ እኽጚ ናትክዲሲ ነፍዓዅ ኣኽነዲን እመሪ ይስሮ ሻኽል። ላኹክ ኒ ወረቢል ኒ ጋብድ ጋቢን፣ ኒቁርድ መቅርሕስን፣ ንብራ ኤድራ እኽን ዪና ከታ ሻኽላ፣ ከተው ዪና ጋብድ ጋባ ዪና ቁርድ መቅርሕሳ እንታ ብራ ዪና ብራ ግን የው ግን። ንጃብር ኒሰና ኮለንቡረዲ ሳደዲ "ተኣከብ ተእንኮትዲ" ዋስኑኹን ቋልኑኹን እርግንኹንኽር። ድደዲ ዓባርድር ንኻ መንፈዓትኻ ቋሊኒ። ላ እክባ (ውድብ) ከደንሊ ዋኑ ናይ ሙርቑኹ ተክለበጋዅ፣ ኤስመራ ጋእ ዮ ኤልብድሮና ግን፣ ዪሮ ሓሰብሰጋኽ ቆላዓ ወራት ግን። ዪጝር ሊጘር ምልሲኖ ሻኽኒ። ድርጝ ያኹድ ዪን ሙርቑሰና ና ጉነዲ ና ደበልትነዲ ፈርሕደኵና። ናዲ ዋኒኖ ሻኽንኹን ህንብነኩንጝር። ኮዶ ፍትሕ ሙሩቑሲ ና ወቐይል (ፕሮግራምል) ናትልድ ገምድድኖ፣ ናንትልድ ሙሩቑ ናይ እምነውልድ ዪና ምራድድ ፍሪርነው ሽማግሌ ሕበርነ ለመለም ዩኖኽር ክድመትል ናዲ ስገስኖኽር ዪና ዋጅብ ግን። ሕበሮሲ ድድኖ ሻኽኒ። ፍትሕ ሙሩቑ እምነጋዅ እክባ (ውድብ) ዉዱቕ ኣኸት ናውክር ፈሀምኑሎሉ ሻኹ እምን ግን። ናን ኣኽታሲክ ዕግርግርሊ ኣኽኒ ጨንትኒል ገምደውና ፍትሕ ሙሩቑ እምነገው እክብ (ውድባት) ና ዋንትነድ ግን።

4. ነበካ ዲባ ሙርቛ ብሊናኹድ ቋላኹድ፣

ብሪል ዋኒኖ ዲባ ክሚኖዲ ይነ ክለል ሰና ወጨም ዋኒሮና ዋጅብ ግን። ዪና ወረበስ ናን ህንባኹሲ ቋልነን ትግርዲ ዓጨበዲ ሹኹደዲ ልሽክክ ጋይተነድሲ ጭልም ኩሶሉ ዋነት ከውታት ወንተተረውዲ ጅዊልድ ሓበረውዲና ህንበነኵ። ኒንኻ ዪና ነሰኸውድ ኣኽን ዪና ኡሰውድ ዪነልድ ትብታኹ ኣኽላ። እና ጨገም ኒንኻ እንክኖሉ ንኪ ኣኽኒ እመሪ ዪና ሙኹር ግን። ከደንሊ መንደርትናኽር ኣኻ ፖሎቲካ እክብሊ ዋንትነጝር ዕሙምድ ሙርቛ ብሊኑኹ ሙኹርዲ ለመለምዲ ተክለብዲ ናይዲ ቋላኹ መድ ሻናኽ ግን። ኒስ እሲኖኻ ፋሪዕ እክባ ሙርቛ ብሊኒኹ /ሆደ/፡ ዲባ ሙርቛ ብሊኒኹ ተከልኖኽር ጠፍሕድኖኽር ዪና ዋጅብ ኣኸት እምነቲ። እና ዲባ ከደንሊ ሙርቛ ብሊኒኹ ተከልሳኽ ከደን ህንበውሲ ቋላኹ ካያ ኣኽላ። ዪና ሕላን ይነድ ኣኾ ኮዶ ወረበድኽር ኮሊስኽር ካርዶ እኸት ሸክ ሻኽኒ። ሻን ሓይሳንዲ ዋቕያንዲ ፋህማንዲ፣ ፋሪዕ እክባ ሙርቛ ብሊኒኹ /ሆደ/፣ እንተት ተክሎብሮ ግን ንሪ ለመለም ዪራኹ። እና ዲባ ኒጝር ናትክ ዓገላዅዲ ሓደርዳኹዲ ኣኽሮ እንታ ካበና ጀረብደኩና። ኤሪ ረኤይ ዋነጝር ከለብረንቲ ግን።

ፍዳታት ዲምክ ዪና ለበክልኽር ዪና ክድመትልኽር መንደርትናው!!!

ፋሺስታ ኢሳያስዲ ኒክረምዲ ሓጨፍስናው!!!!

ፋሪዕ እክባ ሙርቛ ብሊኒኹ /ሆደ/፣ 25/01/2014