blina.org. ብሊና

ብሌና ረድዮራ እቑቱ ታጋሃኒድ ብርፍ ዪረሪ፣ ላ ኤምሪ ክድመትሲ ንርከውዲ
ኣኽሮ ቋልትኽር፣ ንደንቢሲ ኤዋሃብረ ጂቢቶኽር፣ ከዋ ካበነስ እሽብቶኽር ዪስቶ
ከተማ ሎዛን ስዊስል ባሕሮ ዓደምሶ እርጋዂ ሽንግርው ጎሊተንትድ ዓጀብሶ
ሰላምዲ ስርገልዲሲ ደኲዂ።
እና ሰልፋ ባህሮትል እና ሬድዮራ ንብርፍልድ ጋብዲ ዓዋዲት ቋላኩድ ከደምሩ
ዲረዂሲ ናውክ ደገፎ ንደንቢስኽር ርድቕድር ኤምርድር ናሓርድር ካብሲቶ
ሕበርሰው ቆል ቱኖ ህንበነኲ።

A video link in facebook blinradio

እና ባሕሮትል 500 ሊኽ ኤወስይሲ በላይንዲ ሻን ከውታትዲ እንተው ዪና
ወንድናርዲ ሰፈላልዲ ዪና ዓዋዲዲ ጋብዲ ሓወኖ ስጘውሲ እና ባሕሮ ንሰና ትላ
ኣኸት ገድኡዂ።
ንትክልድኻ በህሊንዲ ሻሎዲ ጂብቶውር ጉርበታኽር ወረበስ ባሮ ጋይተው
ጂጝስቱኑኽር ኮድጙኑዂር ዕያላትዲ ማስዲ ሰለለምሱኑኽር እንቛሩኑኽር፣
ቆልዕኻ ወዓቡኑኽር ጋጙኑኽር ና ወንድዲ ኤለለይስጙንጙሲክ ቋልና ኒትክልድክ
ፈርሕዳዂ ግርጋ እርጉዂ።
እና ባሕሮ ንደንብኽር ደበልትኖኽር ደለምኖኽር እስቲሮ፣ ፊነዲ ዱጙዲ
ሽማግሌሲ ኡውሶ፣ እና ኒስ ተምኔተውዲ ለመለም የውዲ ሬድዮ ብሊነር ገሺ
ሓመዶኽር ሳበኽር፣ ኒሰና ሎዛንዲ ስዊስዲትል መንደርተው እና መደብሲ
ሙዂረውሲ ትክያኽር ከበረኽር ፣ ኣማር ኣከንኻ ዪና ኮል ኣከገንኻ መደብሳዂ
ኣካንልክ ዳሕነዲ ሰላምዲ ዲሰ ቋልስጝና ዮ፣ ንሰላምድ ኒ ከውታተል
ወንተሩዂ።
ለንካ ሓበርዲ ክኒዲ ፋሪዕ እክባ ሙርቛ ብሊን ኤርትራ