blina.org. ብሊና

ኡሰሪ ካኒልድኻ ሸምጠጥሮ፣ ብሪልድኻ ሕንፍልዶ፣ መንደርትኑ ኣርጝናዂ ዳለትል ካብሪዲ ገሽዲ ሰጘቲ።

ቢልድኻ ጎድስታዂ፣ ደርብ ሺራዂ ፈርዶኻ ሰቐጥራዂ፣ ኤመሪሲ ዪሮ እንኲርዳዂ ዳልት እንተሰናኻ፣ ነሳዂራ ርድቕ እንኲልኲልኒል ኤዋዂ ናን ሻዂዂ። ንድ ኻ ደፋ ዮ ነሳዂራ ቦሎቲከስር ጎምጨጩ ፈሩዂ። እና ክብር ጙርዊዂሲ ዓውዲስኽር፣ ፍትሕድር፣ እምነትድር፣ ንቊርስቊርሊ ሓለፍዱዂሉ።

ኡሰሪ ንብርፍልድ ግርወስ ሓሸምድቶ ፈጠርስረርጝን፡ ጭፍር ልኲልድ ሽብካ ኣኾሩኹል ኣኽራሲክ ሰርቶ ሻኽቲ፡ ዲብትነበዲ፣ ተበነዲ፣ (ርድቕ እንኲልኩልና) መሀርስነዲ ንርቲ ቛለው ኣኽላ፣ ያዂ በዳን ዓውዲ፣ ለገዱ እንትነዲን፣ ኡሰሪ ዓለምሊ ንር ክብር ነቀሱ እንቱዂ።

አውሮቢል ኣዳሚንዲዂራ ጎደኒልድ ሰንዕንዕኒል ካሮ መንደርትና ቱዎሰና፣ ና ስድቕድ መንደርተው ኡሰርኽር ነሳዂራኽር ጎለለገው ሸቓሎሩዂ ደየን መሀድስኑዂ። ረአስ ማል ኤርደት ና መኽሰብሲ ተከውድኖ ሕኩመታትሲ ና ደርብ ሰጘረውር ኤተየውር እሱኑ ፍርኑዂ። ሸቓሎኻ ብዕል እንጘው ኣኽኑኹ። ክሱሰንኻ ኡሰሪ ኡሰሪ ኣኽረውድ እኲላ ክድመት ነሳዂረዲ ከደምሩ ረአስ ማል ኤርደት እኲላ ማሄየት ከፈሉኑላ ሰጘኒ፣ ናን ጝር ገሪ ኮላተል ኡሰው መሄየትሲ ቋላኹድ ዕሙጫን ጝን። ንድኻ ሸቓሎ እክብስነዲ ፈሀምነዲ ጀረብደትሎም ቛልኑኹ። እክብስኖኻ ና ስድቕሲ ከፈልስድኖ ዕምጭ ደው ዩሮ ለመለም ቲዃ ብርህድኑ ፍረኑዂ።

ገንደላዂ ፈሀም ናውክ እካ-ቊር ፍትሕ ጃብልኽር፣ ክድመትልኽር፣ ቦሎቲኪልኽር፣ እርዋ ጝን ዩኖ እምነነኲ። ናይ እምነው እካ-ቊር ኒስ ዓውቲስድኖ፣ ክድመት ኤብይትነዲ፣ ሰላሙዂ ተርዲ (ሰላማዊ ሰልፊ)፣ ምህሮዲሲ፣ አሪ ደርፍፍዲሲ፣ ቂርዲ ገርክዲ ለመለም የንኲ እንኲኑዂ። ኡሰውር ዲምክ ለመለም ህንበንኲ።

ብርፍ ክብሊሪ ሰኾታ፣ ኡሰው ና ናይ ከብርዶ ሰልፍ እሲነዂ ሰላሙዂ ተር (ሰላማዊ ሰልፊ) 11 ክብሊሪ 1911 ኒዩ ዮርክትል ጝን። ገንደላዂ ረአይ እካ-ቑርሊ ጃቢቱ ፈርነዲን፣ እኩባን መንግስታት ቅሬኑ፣ ዲባ ናይ እካ-ቊሩዂል፣ እና ግርጋ 8 ክብሊሪት፣ ከልብርኖ ኮድኖ ናይ ኡስውድሪዲ ናትካ ሰላምድሪዲ ግርጋ ኣኽቶ ዱጙኑዂ። (United Nation Day for Womens’s Rights and International Peace) ንድኻ አመረድ ኤመራ ከብርድነኲንላ።

ኒን ታሪኽ ኣኾ፣ ንኪ ኡሰሪ ኤርትሪሪ፣ ንር ናይ ዪና ኮሊትል ዉራ ግርብል፣ ህንባዂን፣ ጉርጉርኖ ህንበኲና። ኤሪትሪቚራ ኡስሪ ለመለም ኮሊሩዂል ብሶትሲ ኡረሪ ንርሻንዲ ደዉ ዪሮ በዳን ወክሲ ደኩስረሪ ኣኽረውድ፣ ኡሰሪር ናይ፣ ማእኮት ኮሊሩዂል፣ ሰመሮ ንርሻንዲ እኩላ ኣኽቶ ንርሓቕ ኣርጉዂ። እማ ውራ ኣኽሮ፣ ኤሪትል ህግደፍ ጣልም ሕክምሲ ወረርነዲን ኤርትሪ ኡሰሪ ንርሕ ተደራ ድኳ ኣኽላ። ንስጝ ጂባዃ ክሱስንኻ ንሪ ንርደንብኻ፣ ንር ራጝዲ ንር ቚርዲ ንርሕቚፍልድ መንተልሲኔክ ሓርብድር፣ ጋይትነድር፣ ድደው ኣኽንነዲን ወሸቂል (ሓዘንሊ) መንደርተቲ። ህግደፍር ዳለትል ኤርዶ ብቲ፣ ናን ካይ ባሕ ከብትረ ህንበቲ ዪነን ብን ኣኻል።

ብሊና ኡሰሪ ኮሊር መታን እስተዂ ሓርብል ኤወል ኣኽሮ ለመለም ይረት ናውክ ኢርእናዂ ታሪኽ ጝን። እንሰካ ናውክ ጅብሄትሲ ና ይወሲ ኡዉኑ ብሊና ቚራ ኡሰሪ ታንተርወዲ ከደንዲድት ላድ ከደመስና እስረሪ፣ ለመለም የንቱትት ና ታኲንዲ ና ሰጃይርዲ ና ሽኮርዲ ወተትስሩ ለመለምሲ ልገድረሪ ብሊና ንረውክት እንቶ ንር ፈክ ደገምስራሲክ፣ ንክር ግርጊል ትክስነ አልብድነኲንላ። ኮዶ ንሪ ህንብራዂ መናብረት ለውትስኖ ንርዲ ኣኽኖ ለመለም ዪኖ ማእኮት ቱነኲንላ።

ናውክ ኤርትሪን ኮዶኻ ብሊን ኡሰሪር ግርጋ አልብድኑ፣ ንኪ ኡሰሪ ኤሪትሪሪ ኒውክ ጨልመቶላ ህንባዂ ወክትል ውትረት ህግደፍር ንኻ ኤሪዂ ከታዂ እላ። ጋይትሮ ህንብረሪ ኡሰርኽር፣ ንድኻ ሓዲሲ ኮሊዲ ኤለለይስጝቶ፣ ንድኻ ንርሓዳርሲ ጉቶ፣ ንድኻ ኮል ህንበው ንርከውሲ ካቢቶ፣ በዳን መንብሮትል ሓቆቆየቲ እንዂቲ።

ኒን ደኲሮ፣ 8 ክብሊሪት ኤልብድኑ፣ ዪና ኮሊትልኽር፣ ዪና ወረቢልኽር፣ ፍትሕ እንገት እንሸውሰውዲ ሓቐቐውዲ፣ ጋይቱኑ ድደው ዪና ሻንዲ ዪን ቑርዲ፣ ፍትሕ ሰርገልዶ፣ ኒን ኻ ደው ዩሮ፣ ናውክ እመሪ የግናዂ ክድመት ለመለምዂ ዋነትና አልብድናዂ ግርጋኽር ጝን። ዪና ኮል ህንባዂ ኤባይሲ ዓጨጭኖ እስናዂ ለመለምል፣ ናትካ ሙዂር ጝን። ኮዶ ንደንቢ እንተራዂ መሪ ፋርዕ (ዲሞክራት) ኣኾ ናይ ኤረርናዂ ኣኽሮና፣ ፈሀምድ እክብስኖኽር፣ ሓረክስኖኽር ህንበዂና። ናኽለ የጋዂድ ኒ ገናኽር እወለሉ።

ብሊና ሙርቛ (ቑር)፣ ትራ እክብሰን ገመና እንሸወኲ የናዂ መሰል ሰና፣ ላ ናርድር፣ ገንደለው ፈሀምድር፣ እክብስኖ፣ ዪና ወራትሲ ዪና ናላውድ ሻኽኖር መታን ክብያዂ ፈሀም ቦሎቲኪዂ ጀረብደኲና። ፋሪዕ እክባ ሙርቛ ብሊኑዃ እና ሙዂር ኒስ ሙዂሮ ኒ ወክት ናን ጝን ዮ ጞወ ህንባዂ እክባ ጝን። ኲ ወረበድ ደበልትና ለብሮ ህንብራዂልድ ጒና ጝን፣ ጎደለውሲ መልእድሩ ፈርና ጃቢትና ጝን፣ ላሕመድ ለመለም ዪና ድርብ ገፍ ጝን፣ ላዂክ ንገፍድ ወተርናኻ እንቲ ህብራዂል ደው ዪና ጝን። ሕላን ፋርዕ እክባ ብሊኑዂ ኮሊትርኽር ዪና ወረቢልኽር ሰላምዲ ፍትሕዲ ጝን።

እና ንኪር ግርጊል ዪና ፍርሓትስኽር ዪና በኺረስር ብሊና ሬድዮረሲ ደኲስኑ ገሪ ሓበን ዋስሰኲና። ናን ኣኽታሲክ ንርዉዉ ከተብግናዂ ብሕል ወንቐርኑ፣ ሻን ሓይሳን ቂርዲ ገርክዲ እንታ ወረበድ ሰሄርደናኽርሲ መርሓባ የንኲንኲም።

ሰርገል 8 ክብሊሪ ኡሰውድ ግርጋ!!!

ፋርዕ እክባ ሙርቛ ብሊኑዂ ኤርትራ