blina.org. ብሊና

ሻን ሓይሳንዲ ሓዪሳን ኮሊር ቁርዲ

እክባ ፈሪዕ ሙርቛ ብሊናኽ/ሆደ ንር ብርፍልድ ዪና ኮል ሰላምዲ ናይ ሙሩቑኹዲ እምን ፋርዕ ሕክምዲ ሰረስሮ ለመለም ህንበቲ። ዪን ለመለም ዪናዂ ፋሻት መታን ኣኽጚ ዪና ኮሊትል 25 ኣመራ ጃብ ይነክልዲ ይነሻንዲ ና ብርዲ ና ናሽሽዲት ላሪ በቀቅግኒ ናቅስነሪ ጀበረቲ(ናጽነት)፡ ዕቅቱ ክረም ህግደፍሩውድ መንተልስሮ ራሕመት እንገት ናይ ኮወቚሩዂሲ ዳድኖ መንደርትነት ናትክልድክ ክልውርሳኽ ኣኽላ።

እና ገሽ እንጋት ይነዳግሊ ገሞ ህንባዂ መረራዂ ዕምጭ ሲ ቋለው ቅራናታ-ዲባ  ጉርጉርደሪ ኮሚሽን ደንቢ ኤሪሪ ወንጀልሲ ኣጽኒዕድረሪ (UN Commission of Inquiry on Human Rights (COI)) ፍድኑዂ። ንሪ ሰገርዶ ቋልደውዲ ዋስረውዲት ሓየብሮ ናን ቅረን ዲቢል UN Human Rights Council (HRC) ስክስቶሎም ጝን። ንርኻ ኤርትሪይል ህንባኽ ኣዋይንሲ መመይሮ ኒትክ ‘’ኤርትርይ ሻዓብ ዳግሊ ወንጄል ገማዂ’’ ዩሮ  ናንኻ ብዪን ኒበሄርድክ እና ክረም ህግደፍሩ ሰቐቕስድኖ ኤርባ ትጟንድሪትል እክብሳዂ ናይ ከዋዂድ ሓመማዂል ገምሮ ጝን። ኒስ ቋላኹድ ዪን ቃብሎሩ እክብዲ ናዩ ማሕበራዲ እምን ኣኸት ምስር ኡናዂ ሰላማዊ ሰልፊ የመምሶ ህንበኲ። መሪ ኤርትሪዂሲ ገሽ እንገት ካበውዂ ‘’ኒን እምን ሻኽላ’’ ዪኖ ሰላማዊ ስልፊ እሲድኖ ደለለመነኲ እንኩኑዂ።

ሓይሳን ሻንዲ ሓዪሳን ኮሊ ቑርዲ

ኤርትርይ ቊርዲ ና እንከሉትዲ እን ጉርጉርደሪ ኮሚሽን ሱኲስራዂ፣ ኒልድ ጂበውዲ ደብደብሰውዲ ዪን ፋሪዕ እክባ ሙርቛ ብሊናዂዲ ናውክ ከውታት ኤሪትሪውዲ ኤርአርኣዂሲ ግናቲትዲ በህሊንዲ ጅነቭ ህንበ መክተብ ጭምድ ጃብል 23 ትጟኒትል 2016  እንኩልኩልስኖ፣ እምን ጝን ዪኖኽር ኒድ ኤወይሲ ቛልስሮኽር ዪና ቆል ዓለምድ ዋሲናዂሊ እና ነወያ ታሪኽ ሻኽረሪ ግርጋ ንሂትል ሺራዂ ልድ ኣኽን ትኸትልድ ላድ ሓደርኖሉ ናትክ ሺጝነኲን።

እነ ጉርጉርደሪ ኮሚሽን ቅረናተ-ዲቢል ስክስቶ ፈርዳኽ ክቱብ ዲቢል ስክሮ ከለብርስሮ ኣከን ይን ብጅኽድ ሓደርኖ እምን ኣከት ላ ኣዳም ሰና ስክርኖ ይነ ዳግሊ ይነመቅጠንሊ ይነ ወረቢል ገማኽ ግን ይኖ ሸርኖ(ምስክርነት ኡኖ) ህንባኽና። እና ውራይ ኒንን ናትካዂ ጝን። ካበና እወዉና ዋነንንኻ ኮዶ ከብርድኖሎምኽር ናት ልኸውሲ ብን ጝን ዪኖኽር ዪና ዋጅብ ጝን።
ነጙ ኽር እንቁጚር ሰና ዓውቲቶ ፍሮ ኣከት ሸክ እለና። ናውክ ይን ህንብናኽልድክ ጅነቪ ኣኽራሲክ፡ ኒል ዳሕነድ ኤረርስግኒን፡ ይነ ወረቢል ጃር ሰላም ገምድንይነት።

ሰርገል ከውታት ኤርትርይውድ ኣኽኒ!!!
እክባ ፈራዕ ምርቛ ብሊነሪ/ሆደ